ஒரு டொலர் அபராதத்தை 50 வருடங்களின்பின் செலுத்திய நபர்

அமெரிக்காவைச் சேர்ந்த நபரொருவர் 1953 ஆம் ஆண்டு போக்குவரத்து பொலிஸாரினால்  தனக்கு விதிக்கப்பட்ட ஒரு டொலர் அபராதத்தை 50 வருடங்களுக்குப் பின் செலுத்தியுள்ளார். தனது மனச்சாட்சியை தூய்மையாக வைத்துக்கொள்வதற்காக இந்த அபராதத்தை செலுத்தத் தீர்மானித்ததாக அவர் கூறியுள்ளார்.

ஹவுஸ்டன் நகரைச் சேர்ந்த டேல் கிரவ்போர்ட் என்பவர் 1953 ஆம் ஆண்டு பெப்ரவரி 3 ஆம் திகதி இராணுவத்தில் பணியாற்றியபோது தனது காரை தவறான இடத்தில் செலுத்தியமைக்காக மேற்படி அபராத சீட்டு வழங்கப்பட்டிருந்தது.
அப்போது அவர் அந்த அபராதத்தை செலுத்த மறந்துவிட்டார்.

அண்மையில் தனது பழைய ஆவணங்களை பரிசீலித்துக் கொண்டிருந்தபோது, மேற்படி  அபராத சீட்டை கண்டெடுத்த அவர், குறித்த அந்த  நகர அலுவலகத்திற்கு கடிதமொன்றை அனுப்பியுள்ளார்.

மேற்படி அபராதத்; தொகை சிறியதாக  அவதானிக்கப்படாத தொகையாக இருந்தாலும் கூட தனது மனசாட்சியின்படி அதனை தான் செலுத்தியாக வேண்டுமென்று அவர் தெரிவித்துள்ளார்.

ஹவுஸ்டன் நகர மேயர் அன்னிஸ் பார்கர் இது குறித்து தெரிவிக்கையில் அவர் கிரவ்போரிடின் பணத்தொகையை தானே நேரடியாக  பெற்றுக்கொள்ளவுள்ளதாக தெரிவித்துள்ளார். நகர சபைக்குரிய பணத்தை செலுத்தாமல் தவிர்ப்பவர்களுக்கு  மத்தியில் கிராவ்போர்ட் ஓர் முன்னுதாரணமாக திகழ்வதற்காக அவருக்கு நன்றி தெரிவிப்பதாகவும் மேயர் அறிவித்துள்ளார்.