டச்சுக் கோட்டை : ரூ.108 மில்லியன் நிதி ஒதுக்கீட்டில் புனரமைப்பு

மன்னார் மாவட்டத்தின் வரலாற்றுப் புகழ்பெற்ற சுற்றுலாத் தலமான மன்னார் டச்சுக் கோட்டையின் (Mannar Dutch Fort) தற்போதைய நிலைமைகள் மற்றும் அதன் புனரமைப்புத் தேவைகள் குறித்து ஆராயும் பொருட்டு, வடமாகாண சுற்றுலா பணியகத்தின் தலைவர் மற்றும் தேசிய மக்கள் சக்தியின் பிரதிநிதிகள் நேற்று (28) நேரடி விஜயம் ஒன்றை மேற்கொண்டனர்.

இந்த விஜயத்தின் போது, கோட்டையின் வரலாற்று முக்கியத்துவம் வாய்ந்த பகுதிகள் போதிய பராமரிப்பின்றி சிதைவடைந்து வருவதையும், சுற்றுலாப் பயணிகளைக் கவரும் வகையில் அங்கு அடிப்படை வசதிகள் உடனடியாக மேம்படுத்தப்பட வேண்டியதன் அவசியத்தையும் அதிகாரிகள் சுட்டிக்காட்டினர்.

தொன்மை பாதுகாப்பு: கோட்டையின் வரலாற்றுத் தொன்மையைச் சிதைக்காமல் பாதுகாப்பதோடு, நவீன சுற்றுலாத் தரத்திற்கு ஏற்ப அதனை எவ்வாறு மாற்றியமைக்கலாம் என்பது குறித்து விரிவாகக் கலந்துரையாடப்பட்டது.

பொருளாதார மேம்பாடு: இவ்வாறான வரலாற்றுத் தலங்களை முறையாகப் பராமரிப்பதன் மூலம் மன்னார் மாவட்டத்தின் பொருளாதார வளர்ச்சியை மேம்படுத்தவும், உள்ளூர் மக்களுக்குப் புதிய வேலைவாய்ப்புகளை உருவாக்கவும் முடியும் என இதன்போது வலியுறுத்தப்பட்டது.

தற்போது இக்கோட்டை 108 மில்லியன் ரூபா செலவில் புனரமைக்கப்பட்டு வருகின்றது. குறித்த புனரமைப்புப் பணிகளை எவ்வித தாமதமுமின்றி விரைவில் நிறைவு செய்யுமாறு அங்கிருந்த ஒப்பந்ததாரரிடம் இதன்போது கோரிக்கை முன்வைக்கப்பட்டது.

இந்தக் கள விஜயத்தில் வடமாகாண சுற்றுலாப் பணியகத்தின் தலைவர், தேசிய மக்கள் சக்தியின் மன்னார் மாவட்ட ஒருங்கிணைப்பாளர் மற்றும் கட்சியின் முக்கிய உறுப்பினர்கள் பலரும் கலந்து கொண்டு, கோட்டையின் ஒவ்வொரு பகுதியையும் பார்வையிட்டதுடன் அவசர திருத்தப் பணிகள் குறித்து கேட்டறிந்தனர்.

எஸ்.ஆர்.லெம்பேட்