’நடமாடும் கலைப் படைப்பாக’ ஜொலித்த ஈஷா அம்பானி

உலகப் புகழ்பெற்ற 'மெட் காலா 2026' (Met Gala 2026) நிகழ்வில், இந்தியத் தொழிலதிபர் ஈஷா அம்பானி (34) தனது குடும்பப் பாரம்பரியத்தையும் கலைநயத்தையும் பறைசாற்றும் வகையில் தோன்றி உலக நாடுகளின் கவனத்தை ஈர்த்துள்ளார்.

இந்த ஆண்டின் மெட் காலா கருப்பொருளான "கலையே ஆடை" (Fashion Is Art) என்பதற்கேற்ப, வடிவமைப்பாளர் கௌரவ் குப்தா ஈஷாவிற்காகப் பிரத்யேகமான தங்க நிறப் புடவையை வடிவமைத்திருந்தார்.

சுத்தமான தங்க நூல்களைக் கொண்டு 25 கைவினைஞர்கள் சுமார் 1,200 மணிநேரம் உழைத்து இந்த ஆடையை உருவாக்கியுள்ளனர்.

இந்த ஆடையுடன் அவர் அணிந்திருந்த 'சிற்ப வடிவிலான மேலங்கி' (Sculptural Cape), அவருக்கு ஒரு ஒளிவட்டம் போன்ற தோற்றத்தை அளித்தது.

ஈஷா அணிந்திருந்த ஆடையின் மேல் பகுதியில் (Bodice), அவரது தாயார் நீதா அம்பானியின் சேகரிப்பில் இருந்த 200-க்கும் மேற்பட்ட வைரங்கள் கையால் தைக்கப்பட்டிருந்தன.

"எனது ஆடையின் மேல் பகுதி முழுவதும் எனது தாயாரின் நகைகளால் நிறைந்துள்ளது," என்று ஈஷா நெகிழ்ச்சியுடன் தெரிவித்தார்.

அவர் அணிந்திருந்த ஆபரணங்களில், தனது குழந்தைகள் பிறந்தபோது பரிசாகப் பெற்ற 'சென்டிமென்ட்' நகைகளும் இடம்பெற்றிருந்தன.

மேலும், லோரெய்ன் ஸ்வார்ட்ஸ் வடிவமைத்த வைரச் சோக்கர் மற்றும் 50 காரட் மரகத நகைகளையும் அவர் அணிந்திருந்தார்.

ஈஷா அம்பானி தனது கையில் ஒரு பளபளப்பான வலைப் பையை ஏந்தியிருந்தார். அதில் ஒரு மாம்பழம் இருப்பது போன்ற தோற்றம் இருந்தபோதிலும், அது உண்மையில் புகழ்பெற்ற இந்தியக் கலைஞர் சுபோத் குப்தாவால் உருவாக்கப்பட்ட ஒரு சிற்பமாகும்.

ஈஷாவின் தாயார் நீதா அம்பானி (62), சமீபத்தில் டைம்100 (TIME100) விழாவில் வரலாற்றுச் சிறப்புமிக்க 101 காரட் வைரத்தை அணிந்து செய்திகளில் இடம்பிடித்தது குறிப்பிடத்தக்கது.

அதே வரிசையில் தற்போது ஈஷாவும் மெட் காலா மேடையில் இந்தியக் கலையை உலகத் தரத்தில் பிரதிபலித்துள்ளார்.

ரிலையன்ஸ் ரீடெய்ல் (Reliance Retail Ventures) பிரிவின் நிர்வாக இயக்குநராக இருக்கும் ஈஷா அம்பானி, 2025 நிதியாண்டில் தனது தலைமையிலான நிறுவனத்தின் மூலம் 38.7 பில்லியன் டாலர் வருவாயை ஈட்டி ஒரு வெற்றிகரமான தொழிலதிபராகவும் திகழ்கிறார்.