ஹிங்குரானையில் மென் வேலைத்திட்டம்

(ஹனீக் அஹமட்)

தமண பிரதேச செயலகப் பிரிவுக்குட்பட்ட ஹிங்குரான - கரல்லவ பகுதியில் சுமார் 35 வருடங்களாகக் காடு பிடித்துப் போயிருந்த இடமொன்றை அப்பிரதேச மக்கள் உலக உணவுத் திட்டத்தின் 10 நாட்களைக் கொண்ட மென் வேலைத் திட்டத்தின்கீழ் சுத்தப்படுத்தி, அங்கு தென்னை மற்றும் பலா மரக் கன்றுகளை நட்டு அப்பகுதியை நேற்று அழகுபடுத்தினர்.

இந்நிகழ்வில் தமண பிரதேச செயலாளர் சுபாசினி குலதுங்க, உலக உணவுத் திட்டத்தின் அம்பாறை மாவட்டப் பிராந்தியக் காரியாலயத்தின் தலைவி செனப் ஹெபிட்டி, ஹிங்குரான உத்தர ஜய மகா விகாராதிபதி ஹிங்குரான ஸ்ரீதம்ம ஹிமி உள்ளிட்ட பல முக்கியஸ்தர்கள் கலந்து கொண்டு மரக்கன்றுகளை நட்டனர்.

உலக உணவுத் திட்டத்தின் இது போன்ற 16 மென் வேலைத்திட்டங்கள் இடம்பெறுவதாகவும், நேற்று கரல்லவ பகுதியில் இடம்பெற்ற மென் வேலைத்திட்டத்தின் மூலம் 625 பொதுமக்கள் உலக உணவுத் திட்டத்தினால் வழங்கப்பட்ட உணவுகளைப் பெற்றுப் பயனடைந்ததாகவும் தெரிவிக்கப்படுகிறது.