‘தொடர்ந்தும் தமிழ் மக்களை ஏமாற்ற முடியாது’

நாட்டிலுள்ள அனைத்துப் பெரும்பான்மைக் கட்சியினரும் தமிழ் மக்கள் எதிர்பார்க்கின்ற தீர்வுத்திட்ட விடயங்களில் தொடர்ந்தும் ஏமாற்றியே வந்துள்ளனர் எனத் தெரிவித்த தமிழ்த் தேசியக் கூட்டமைப்பின் அம்பாறை மாவட்ட நாடாளுமன்ற உறுப்பினர் கவீந்திரன் கோடீஸ்வரன், இனியும் தமிழ் மக்களை ஏமாற்ற முடியாதென்றார்.

திருக்கோவில், தம்பிலுவில் 01 தெற்கு கிராம அபிவிருத்திச் சங்கக் கட்டடத்தில் நேற்று (28) மாலை நடைபெற்ற மக்கள் சந்திப்பில் கலந்துகொண்டு உரையாற்றும் போதே, அவர் இவ்வாறு தெரிவித்ததார்.

அவர் அங்கு தொடர்ந்தும் உரையாற்றுகையில், நாட்டிலுள்ள பெரும்பான்மைக் கட்சியினர் தாம் முடிவுகளை எடுத்து, தமிழ் மக்களின் வாக்குகளைச் சூரையாட முடியாதெனவும்  தமிழ் மக்கள் தற்போது விழிப்படைந்து, அரசியலை நன்கு தெரிந்தவர்களாக இருக்கின்றார்கள் எனவும் தெரிவித்தார்.

மேலும்,  நடைபெறவுள்ள ஜனாதிபதித் தேர்தலில் யாருக்கு வாக்களித்தால் தமது கோரிக்கைகளை வெற்றிகொள் முடியுமென தமிழ் மக்கள் உணர்வுபூர்வமாகச் சிந்தித்து வருகின்றார்கள் எனவும்  கவீந்திரன் கோடீஸ்வரன் எம்.பி தெரிவித்தார்.