மடிக்கணினிகள் 6ஐ திருடிய ஐவருக்கு விளக்கமறியல்

பாறுக் ஷிஹான், சகா

அம்பாறை, சம்மாந்துறை அல் முனீர் பாடசாலை அதிபர் காரியாலயத்தை உடைத்து, அங்கிருந்த அலுமாரியில் வைக்கப்பட்டிருந்த 6 புதிய மடிக்கணினிகளைத் திருடிய 5 சந்தேகநபர்களை 14 நாட்கள்   விளக்கமறியலில் வைக்குமாறு,  சம்மாந்துறை நீதவான் ஐ.என் றிஸ்வான் உத்தரவிட்டுள்ளார்.

தலா 150,000 ரூபாய் பெறுமதியான மடிக்கணினிகள் 6 திருடப்பட்டுள்ளதாக கடந்த 05 ஆம் திகதி சம்மாந்துறை பொலிஸாருக்கு முறைப்பாட்டு கிடைக்கப் பெற்றிருந்தது.

இம்மாதம் 01ஆம் திகதி இறுதியாக பாடசாலை செயற்பாடுகள் நடைபெற்று அனைத்தும் பூட்டப்பட்டிருந்தது. பின்னர் தொடர்ச்சியாக 3 நாட்கள் விடுமுறையின் பின்னர் திங்கட்கிழமை பாடசாலைக்கு சென்ற அதிபர், தனது அறை உடைக்கப்பட்டு, மடிக்கணனிகள் திருடப்பட்டுள்ளதை அவதானித்துள்ளார்.

இதற்கமைய, பொலிஸாரிடம் அதிபர் முறைப்பாடு செய்ததற்கமைய பொலிஸ் குழுவினர், சம்மாந்துறை பிரதேசத்தைச் சேர்ந்த 20, 23,25,30 வயதுகளையுடைய 5 சந்தேகநபர்களைக் கைதுசெய்துள்ளனர்.

இருந்து திருடப்பட்ட 6 மடிக்கணினிகள் மற்றும் உதிரிப்பாகங்கள் அனைத்தும் மேற்படி கைது செய்யப்பட்டவர்களிடம் இருந்து மீட்கப்பட்டுள்ளதாக சம்மாந்துறை பொலிஸார் தெரிவித்தனர்.

தொடர்ந்து சம்மாந்துறை நீதிமன்ற நீதவான் முன்னிலையில் நேற்று (11) சந்தேகநபர்கள் ஆஜர்படுத்தப்பட்டதை அடுத்து, அந்த ஐவரையும் 14 நாட்கள் விளக்கமறியலில் வைக்குமாறு  நீதவான் உத்தரவிட்டுள்ளார்.