மாநகர சபை வாகனங்களுக்கு ஜிபிஸ் பொருத்த நடவடிக்கை

பாறுக் ஷிஹான், அஸ்லம் எஸ்.மௌலானா

கல்முனை மாநகர சபை வாகனங்களை சட்டவிரோத நடவடிக்கைகளுக்காக பயன்படுத்துவதைத் தடுக்க ஜிபிஸ் தொழிநுட்பம் பொருத்த நடவடிக்கைகள் எடுக்கப்பட்டுள்ளதாக கல்முனை மாநகர மேயர் சிரேஷ்ட சட்டத்தரணி ஏ.எம்.றகீப்  தெரிவித்தார்.

மாநகர சபையின் 36ஆவது மாதாந்த பொதுச் சபை அமர்வு, நேற்று (30) பிற்பகல் நடைபெற்றபோது அவர் இவ்வாறு தெரிவித்தார். 

 மாநகர சபை வாகனங்கள் சட்டவிரோத நடவடிக்கைகளுக்குப் பயன்படுத்தப்படுவதாகவும் உரிய அனுமதியின்றி தனியாருக்கு வாடகை அடிப்படையில் பயன்படுத்தப்படுவதாகவும், அகில இலங்கை மக்கள் காங்கிரஸின் கல்முனை மாநகர சபை உறுப்பினர் சி.எம்.முபீத், குறித்த அமர்வில் சுட்டிக்காட்டி  உரையாற்றினார்.

இது விடயம் தொடர்பில் ஏனைய உறுப்பினர்களும் கருத்துகளை முன்வைத்தனர்.

இதனை தொடர்ந்து பதிலளித்த மேயர், மாநகர சபை வாகனங்களை  சட்டவிரோத நடவடிக்கைகளுக்காக பயன்படுத்துவதை தடுக்க ஜிபிஸ் தொழிநுட்பம் பொருத்த நடவடிக்கைகள் எடுக்கப்பட்டுள்ளதாக தெரிவித்தார்.

மேலும், வாகனங்கள் முறைகேடாக பயன்படுத்தப்பட்டுள்ளதாக உறுப்பினர்கள் தெரிவித்த விடயம் தொடர்பில் ஆராய்ந்து நடவடிக்கை எடுக்க ஐவர் கொண்ட குழு நியமிக்கப்பட்டு, அதன் அறிக்கை கிடைத்ததுடன், உரிய நடவடிக்கை எடுக்கப்படுமெனவும் உறுதியளித்தார்.