மாற்றுத் திறனாளிகளுக்கு நகரும் கழிப்பறை

வீடு, பொது இடங்களில் மாற்றுத் திறனாளிகள் பயன்படுத்துவதற்காக நகரும் நவீன கழிப்பறையை மதுரையைச் சேர்ந்த மின்னியல் வல்லுநர் எம். அப்துல் ரசாக் கண்டுபிடித்துள்ளார்.

ரயில், பஸ், விமான நிலையங்கள், வைத்தியசாலைகள், வர்த்தக நிறுவனங்கள், திருமண மண்டபங்கள் போன்ற பொது இடங்களில் மக்கள் பயன்பாட்டுக்கென இந்திய வகைக் கழிப்பறைகளும், முதியோருக்கு மேற்கத்திய வகைக் கழிப்பறை வசதிகளும் ஏற்படுத்தப்படுகின்றன.

ஆனால் இந்தக் கழிப்பறைகளை அனைத்து வகையான மாற்றுத்திறனாளிகளும் பயன்படுத்துவதில் சிரமத்துக்கு ஆளாகின்றனர்.

இதைத் தவிர்க்கும் விதமாக நவீன நகரும் கழிப்பறைக் கோப்பையை வடிவமைத்து மதுரை பீபீ.குளம் பகுதியைச்சேர்ந்த எம். அப்துல் ரசாக்(50) சாதனை புரிந்துள்ளார்.

ஏற்கெனவே தண்டவாள விரிசல் கண்டறிதல், ராணுவ வீரர்களுக்காகப் பனி தாங்கும் கோட், ரைஸ் குக்கர், கடல் நீரில் எண்ணெய் பிரித்தெடுக்கும் கருவி உள்ளிட்ட பல்வேறு கருவிகளைக் அப்துல் ரசாக் கண்டுபிடித்துள்ளார் என்பது குறிப்பிடத்தக்கது.