19இல் பூமியை வந்தடைவார் சுனிதா?

ஸ்பேஸ்எக்ஸ் டிராகன் விண்கலம்,  நாசா விஞ்ஞானிகளுடன் சர்வதேச விண்வெளி நிலையத்துக்கு, ஞாயிற்றுக்கிழமை (16) காலை சென்றடைந்துள்ளது.

சர்வதேச விண்வெளி நிலையத்திற்கு (ஐ.எஸ்.எஸ்.) கடந்த ஆண்டு ஜூன் 5-ந்தேதி ஸ்டார்லைனர் விண்கலத்தில் ஆய்வு பணிக்காக சென்ற பச் வில்மோர் மற்றும் சுனிதா வில்லயம்ஸ் ஆகியோரை பூமிக்கு அழைத்து வருவதற்காக அனுப்பப்பட்ட  டிராகன் விண்கலத்துடன் பால்கன் 9 ரக ரொக்கெட் ஒன்று சனிக்கிழமை (15) அதிகாலை புறப்பட்டு சென்றது. 

இந்த ரொக்கெட் சனிக்கிழமை (15) இரவு 11.30 மணியளவில் ஐ.எஸ்.எஸ்.-சுக்கு சென்றடையும் என எதிர்பார்க்கப்பட்டது. 

இந்நிலையில், நாசா குழுவினர் ஞாயிற்றுக்கிழமை (16) காலை 9.40 மணிக்கு சர்வதேச விண்வெளி நிலையத்திற்கு சென்றடைந்துள்ளனர். இதனால், நீண்டகாலம் காத்திருக்கும் சுனிதா மற்றும் வில்மோர் இருவரும் பூமிக்கு திரும்புவதற்கான முக்கிய நடவடிக்கை நிறைவடையும் நிலையில் உள்ளது.

இந்த நடவடிக்கையை ஐ.எஸ்.எஸ். குழுவினர் மற்றும் விண்கல குழுவினர் கண்காணித்தனர். சுனிதா மற்றும் வில்மோர் இருவருக்கும் இது இறுதி கட்ட விண்வெளி திட்டம் என கூறப்படுகிறது. வருகிற 19ஆம் திகதி வில்மோர் மற்றும் வில்லயம்ஸ் இருவரும் அந்த விண்கலத்தில் புறப்பட்டு பூமிக்கு திரும்புவார்கள்.