ஈரானின் தந்திரோபாயம்: ட்ரம்புக்கு மிகப்பெரிய சிக்கல்

மத்திய கிழக்கில் அமெரிக்கா மற்றும் இஸ்ரேலின் தீவிரத் தாக்குதல்களுக்கு உள்ளாகியுள்ள ஈரான், இந்தப் போரை குறுகிய காலத்தில் முடிவுக்குக் கொண்டுவர விரும்பாமல், அதனை நீண்டகால மோதலாக மாற்றும் வியூகத்தைக் கையாண்டு வருகிறது. 

ஈரானின் புதிய இடைக்காலத் தலைமைத்துவம், போரைத் தற்காப்பு நிலையில் இருந்து மாற்றி, பிராந்தியம் முழுவதும் விரிவுபடுத்துவதன் மூலம் அமெரிக்காவிற்கான போரின் செலவை (Cost of War) அதிகரிக்க முயல்கிறது. 

குறிப்பாக, அமெரிக்காவின் ஏவுகணைத் தடுப்பு அமைப்புகளை (Missile Defense Systems) அதிகப்படியான மலிவு விலை ஏவுகணைகளை ஏவிச் சோர்வடையச் செய்வதே ஈரானின் முதன்மைத் திட்டமாகும்.

ஈரானின் இந்த 'நீண்டகாலப் போர்' (War of Attrition) தந்திரோபாயம், அமெரிக்க ஜனாதிபதி டொனால்ட் ட்ரம்ப்பின் அரசியல் பொறுமையைச் சோதிக்கும் நோக்கம் கொண்டது. 

ட்ரம்ப் இந்தப் போரை நான்கு வாரங்களுக்குள் முடிக்கத் திட்டமிட்டுள்ள நிலையில், ஈரான் அதனை மாதக் கணக்கில் இழுத்தடிப்பதன் மூலம் அமெரிக்கப் பொருளாதாரத்திற்கு நெருக்கடி கொடுக்க முயல்கிறது.

ஹோர்மஸ் நீரிணை (Strait of Hormuz) மற்றும் ஏனைய கடல்சார் வணிகப் பாதைகளில் இடையூறுகளை ஏற்படுத்துவதன் மூலம் உலகளாவிய எரிசக்தி விலையை உயர்த்தி, அமெரிக்க மக்களுக்குப் போரின் மீதான அதிருப்தியை உருவாக்க ஈரான் திட்டமிட்டுள்ளதாகப் பாதுகாப்பு ஆய்வாளர்கள் கருதுகின்றனர்.

கள நிலைவரப்படி, ஈரான் தனது பதிலடித் தாக்குதல்களை வெறும் இராணுவத் தளங்களுடன் நிறுத்தாமல், வளைகுடா நாடுகளின் பொருளாதார மையங்கள் மற்றும் எண்ணெய் சுத்திகரிப்பு நிலையங்கள் மீதும் திருப்பிவிட்டுள்ளது. 

இதன் மூலம் அமெரிக்காவின் நட்பு நாடுகளுக்குப் பாதுகாப்பு அச்சுறுத்தலை உருவாக்கி, அவர்கள் மூலமாகவே வொஷிங்டனுக்குப் போர் நிறுத்த அழுத்தத்தைக் கொடுக்க வைப்பதே ஈரானின் இராஜதந்திரமாகும். 

அத்துடன், ரஷ்யா மற்றும் சீனாவுடனான தனது முத்தரப்பு உடன்படிக்கையைப் பயன்படுத்தி, சர்வதேசத் தடைகளைத் தாண்டிப் பொருளாதார ரீதியாகத் தாக்குப்பிடிக்கவும் ஈரான் முயற்சித்து வருகிறது.

ட்ரம்ப் நிர்வாகம் ஈரானின் ஆட்சி மாற்றத்தை (Regime Change) இலக்காகக் கொண்டு செயல்படும் நிலையில், ஈரானோ "நிலைத்து நிற்றல்" (Endurance) என்பதையே தனது வெற்றியாகக் கருதுகிறது. 

அமெரிக்காவின் அதிநவீன ஆயுதங்களுக்கு எதிராகத் தனது 'நிழல் இராணுவம்' (Proxy Networks) மற்றும் இணையவழித் தாக்குதல்களை (Cyber Warfare) ஈரான் முடுக்கிவிட்டுள்ளது. 

இந்தப் போர் எவ்வளவு தூரம் நீடிக்கிறதோ, அவ்வளவு தூரம் ட்ரம்ப்பின் "அமைதிக்கான ஜனாதிபதி" என்ற பிம்பம் மற்றும் உள்நாட்டு அரசியல் செல்வாக்கிற்கு அது சவாலாக அமையும் என ஈரான் நம்புகிறது.