கட்டாரிடம் உக்ரைன் ஜனாதிபதி விடுத்த வேண்டுகோள்

அணு ஆயுதங்களைப் பற்றிய ரஷ்யாவின் தற்பெருமை, ஆபத்தான ஆயுதப் போட்டியைத் தூண்டுகிறது என, உக்ரைன் ஜனாதிபதி விலோடிமிர் ஜெலன்ஸ்கி தெரிவித்தார்.

கட்டார் தலைநகர் டோஹாவில் சர்வதேச அரசியல் மற்றும் வணிகத் தலைவர்களின் வருடாந்த கூட்டத்தில் காணொளி வாயிலாக கலந்துகொண்டு பேசிய போதே இந்த விடயத்தை அவர் தெரிவித்தார்.  

எரிசக்தியை ஆயுதமாகப் பயன்படுத்தும் ரஷ்யாவின் முயற்சிகளை எதிர்கொள்வதற்கு, கட்டார் இயற்கை எரிவாயு உற்பத்தியை அதிகரிக்க வேண்டும் என்றும் அவர் கோரிக்கை விடுத்தார். 

“ஒரு குறிப்பிட்ட நாட்டை மட்டுமின்றி முழு உலகையும் அணு ஆயுதத்தால் அழிக்க முடியும் என்று தற்பெருமை பேசுகிறார்கள். 1990களில் உக்ரைன் தனது அணுசக்தி கையிருப்பை அகற்றியபோது ரஷ்யா உட்பட உலகின் மிகவும் சக்திவாய்ந்த நாடுகள் பாதுகாப்பு உத்தரவாதம் வழங்கின“ என்பதையும் அவர் சுட்டிக்காட்டினார்.