துவாரகசீலன், கஜீபன் சதங்களால் யாழ். சென்.ஜோன்ஸ் வெற்றி

-குணசேகரன் சுரேன் 

இலங்கை பாடசாலைகள் கிரிக்கெட் சங்கத்தின் ஏற்பாட்டில், 19 வயதுப்பிரிவு பிரிவு 3 அணிகளுக்கிடையிலான மட்டுப்படுத்தப்படாத ஓவர்கள் கொண்ட இரண்டு நாள் கிரிக்கெட் சுற்றுப்போட்டியில் ஆட்டமொன்று கடந்த 19ஆம் திகதி யாழ்ப்பாண சென்.ஜோன்ஸ் கல்லூரி மைதானத்தில் நடைபெற்றது. 

சென்.ஜோன்ஸ் கல்லூரி அணியை எதிர்த்து கண்டி அல் அஷார் கல்லூரி அணி மோதியது. 

பி.துவாரகசீலன் (131), டி.கஜீபன் (104) ஆகியோரின் சதங்கள் மற்றும் லோகதீஸ்வரனின் ஹெட்ரிக் விக்கெட் சாதனையுடன் யாழ்ப்பாண சென்.ஜோன்ஸ் கல்லூரி அணி இனிங்ஸ் மற்றும் 166 ஓட்டங்களால் அபார வெற்றியீட்டியது. 

இரண்டு சதங்கள் 

நாணயச் சுழற்சியில் வென்று முதலில் துடுப்பெடுத்தாடிய சென்.ஜோன்ஸ் அணி பி.துவாரகசீலனின் 131 ஓட்டங்கள், ரி.கஜதீபனின் 104 ஓட்டங்கள் மூலம் 9 விக்கெட்களை இழந்து 407 ஓட்டங்களை எடுத்தது. எஸ்.ஜெனி பிளமிங் 44, எம்.சிந்துர்ஜன் 37 ஓட்டங்களைப் பெற்றுக்கொடுத்ததுடன், உதிரிகளாக 45 ஓட்டங்கள் பெறப்பட்டன. 

பந்துவீச்சில் அல் அஷார் கல்லூரி சார்பாக எம்.றஹ்மதுல்லா 22 ஓவர்கள் பந்துவீசி 121 ஓட்டங்கள் கொடுத்து 4 விக்கெட்களை கைபற்றினார்.

ஹட்ரிக் விக்கெட் வீழ்த்திய லோகதீஸ்வரன் 

பதிலுக்கு தமது முதலாவது இனிங்ஸை ஆரம்பித்த, கண்டி அல் அஷார் கல்லூரி அணிக்கு சென்.ஜோன்ஸ் கல்லூரியின் பந்துவீச்சு சவாலாக அமைந்தது. சென்.ஜோன்ஸ் அணியின் ஆர்.லோகதீஸ்வரன் 19 ஆவது ஓவரில் தொடர்ந்தும் 3 விக்கெட்களை வீழ்த்தி ஹெட்ரிக் சாதனை நிகழ்த்தினார். 

அல் அஷார் கல்லூரி அணி 25 ஓவர்களில் 89 ஓட்டங்களுக்கு சகல விக்கெட்களையும் இழந்தது. துடுப்பாட்டத்தில் என்.முகமட், என்.றிஜாஜ் ஆகியோர் தலா 22 ஓட்டங்களை பெற்றுக்கொடுத்தனர்.

பந்துவீச்சில் லோகதீஸ்வரன், 7 ஓவர்கள் பந்துவீசி 16 ஓட்டங்களுக்கு 4 விக்கெட்களையும், கே.கபில்ராஜ் 3 விக்கெட்களையும் கைப்பற்றினார்.

பலோஒன் முறையில் மீண்டும் தமது இரண்டாவது இனிங்ஸூக்காக துடுப்பெடுத்தாடிய, அல் அஷார் அணியை தோல்வியிருந்து காப்பாற்ற, என். முஹம்மத் போராடிய போதும், அது பயனளிக்கவில்லை. அந்த அணி 31.2 ஓவர்களில் 152 ஓட்டங்களுக்குச் சகல இலக்குகளையும் இழந்தது. என். முஹம்மத் 63, ஏ.அஸ்மர் 24 ஓட்டங்களைப் பெற்றுக்கொடுத்தனர். 

பந்துவீச்சில் சென்.ஜோன்ஸ் சார்பாக, ஆர்.லோகதீஸ்வரன் 13.2 ஓவர்கள் பந்துவீசி 51 ஓட்டங்களை விட்டுக்கொடுத்து 4 விக்கெட்டுக்களைக் கைப்பற்றினார்.