6 விக்கெட்டுகளால் சென்.ஜோன்ஸ் வெற்றி

George / 2015 ஜனவரி 05 , மு.ப. 08:02 - 0 - {{hitsCtrl.values.hits}}

-குணசேகரன் சுரேன்

பி.துவாரகசீலனின் சகலதுறை ஆட்டத்தின் காரணமாக சென்.ஜோன்ஸ் கல்லூரி 6 விக்கெட்களால் ஜா – எல கிறிஸ்ட் கிங் கல்லூரி அணியை வெற்றிபெற்றது.

இலங்கை பாடசாலைகள் கிரிக்கெட் சங்கத்தின் ஏற்பாட்டில் 19 வயதுப்பிரிவு பிரிவு 3 அணிகளுக்கிடையிலான மட்டுப்படுத்தப்படாத ஓவர்கள் கொண்ட கிரிக்கெட் போட்டி தற்போது இடம்பெற்று வருகின்றது.

இந்த சுற்றுப்போட்டியின் போட்டியொன்று சென்.ஜோன்ஸ் கல்லூரி மைதானத்தில் சென்.ஜோன்ஸ் கல்லூரி அணிக்கும் ஜா – எல கிறிஸ்ட் கிங் கல்லூரி அணிக்கும் இடையில் கடந்த வெள்ளிக்கிழமை (02) மற்றும் சனிக்கிழமை (04) ஆகிய இரு தினங்கள் நடைபெற்றது.

நாணயச் சுழற்சியில் வெற்றிபெற்ற சென்.ஜோன்ஸ் அணி முதலில் துடுப்பெடுத்தாடி, 60.4 ஓவர்களில் அனைத்து விக்கெட்டுக்களையும் இழந்து, 196 ஓட்டங்களைப் பெற்றது. துடுப்பாட்டத்தில் பி.துவாரகசீலன் 40, எம்.சிந்துஜன் 37, ஆர்.பிரிசங்கர் 35 ஓட்டங்களைப் பெற்றுக்கொடுத்தனர்.

பந்துவீச்சில் கிறிஸ்ட் கிங் சார்பாக, எச் பெரோ 9.4 ஓவர்கள் பந்துவீசி 24 ஓட்டங்களை விட்டுக்கொடுத்து 6 விக்கெட்டுக்களை கைப்பற்றினார்.

பதிலுக்கு முதலாவது இனிங்ஸை துடுப்பெடுத்தாடிய கிறிஸ்ட் கிங் அணி, 39.2 ஓவர்களில் 83 ஓட்டங்களுக்குச் சகல விக்கெட்டுக்களையும் இழந்தது. துடுப்பாட்டத்தில் ஆர்.டி சில்வா 21 ஓட்டங்களைப் பெற்றுக்கொடுத்தார்.

பந்துவீச்சில் சென்.ஜோன்ஸ் சார்பாக பி.துவாரகசீலன் 04, ஜே.கிசாந்துஜன் 03, கே.கபில்ராஜ் 02 விக்கெட்டுக்களைக் கைப்பற்றினார்கள்.

இரண்டு நாள் துடுப்பாட்ட போட்டியில், இரண்டாவதாக துடுப்பெடுத்தாடும் அணி 100 ஓட்டங்களுக்கும் அதிகமான ஓட்டங்களை குறைவாக பெற்றால் மீண்டும் இரண்டாவதாக துடுப்பெடுத்தாடிய அணியே, மீண்டும் துடுப்பெடுத்தாடவேண்டும் என்ற விதிக்கமைய (பலோ ஓன்) கிறிஸ்ட் கிங் அணி இரண்டாவது இனிங்ஸூக்காக மீண்டும் களமிறங்கியது.

இரண்டாவது இனிங்ஸில் மிகுந்த போராட்டத்தை வெளிப்படுத்திய அவ்வணி, 90.3 ஓவர்களை எதிர்கொண்டு 194 ஓட்டங்களுக்கு சகல விக்கெட்டுக்களையும் ; இழந்தது. துடுப்பாட்டத்தில் தரிந்து பெரேரா 94 ஓட்டங்களைப் பெற்றுக்கொடுத்தார்.

பந்துவீச்சில் சென்.ஜோன்ஸ் சார்பாக ஏ.கானாமிர்தன் 63 ஓட்டங்களை விட்டுக்கொடுத்து 5 விக்கெட்டுக்களையும், ஏ.ஹரோல்ட் லக்கி 2 விக்கெட்டுக்களையும் கைப்பற்றினார்கள்.

82 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய சென்.ஜோன்ஸ் அணி, 9.1 ஓவர்களில் 4 விக்கெட்டுக்களை இழந்து வெற்றியிலக்கை அடைந்தது. துடுப்பாட்டத்தில் ஏ.கானாமிர்தன் 30, பி.துவாரகசீலன் 24 ஓட்டங்களைப் பெற்றுக்கொடுத்தனர்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .