கபரகொயா கடித்த மீனவரின் சடலம் மீட்பு

ரஸீன் ரஸ்மின்

புத்தளம் - மஹகும்புக்கடவல பகுதியில் உள்ள மோகரிய குளத்திலிருந்து மீனவரான மஹகும்புக்கடவலையைச் சேர்ந்த திருமணமாகாத  51 வயதான தசாநாயக்க முதியன்சேலாகே சுனில்   செவ்வாய்க்கிழமை (28) சடலமாக மீட்கப்பட்டுள்ளார்.

குளத்தில் வலையைக் கட்டி, மீன் பிடிக்கும் தொழிலை இடைக்கிடையே மேற்கொண்டு வரும்  இவர், திங்கட்கிழமை (27)  வீட்டிலிருந்து வெளியே சென்றுள்ளார். செவ்வாய்க்கிழமை (28) இரவு சடலமாக மீட்கப்பட்டார்.

 மோகரிய குளத்தில் சடலமொன்று மிதப்பதாக பொலிஸாருக்கு கிடைத்த தகவலின் அடிப்படையில், சம்பவ இடத்திற்கு சென்ற பொலிஸார்   சடலத்தை மீட்டு பிரேத பரிசோதனைக்காக புத்தளம் தள வைத்தியசாலைக்கு கொண்டு செல்லப்பட்டுள்ளனர்.

சடலத்தின் முகப் பகுதி சிதைவடைந்த நிலையில் காணப்படுவதாகவும், கபரகொயா எனும் நீர் உடும்பு (Asian water monitor ) குறித்த மீனவரின் முகப் பகுதியை சாப்பிட்டிருக்கலாம் என சந்தேகிப்பதாகவும் புத்தளம் பகுதிக்குப் பொறுப்பான திடீர் மரண விசாரணை அதிகாரி தெரிவித்துள்ளார்.