அவுஸ்திரேலியப் பெண்ணுக்கு நேர்ந்த விபரீதம்

காலி உனவட்டுன பகுதியிலுள்ள ஆயுர்வேத மசாஜ் நிலையம் ஒன்றில் சிகிச்சை பெறச் சென்ற வெளிநாட்டுப் பெண் ஒருவரைத் துன்புறுத்திய குற்றச்சாட்டில், மசாஜ் நிலைய ஊழியர் ஒருவர் பொலிஸாரால் கைது செய்யப்பட்டுள்ளார்.

கடந்த 6-ஆம் திகதி, அவுஸ்திரேலிய நாட்டுப் பெண் ஒருவர் உனவட்டுனவிலுள்ள மசாஜ் நிலையம் ஒன்றிற்குச் சிகிச்சைக்காகச் சென்றுள்ளார். இதன்போது, அங்கு பணியாற்றிய ஊழியர் ஒருவர் அவருக்கு சிகிச்சையளிப்பதாகக் கூறி, அப்பெண்ணைத் தவறான முறையில் துன்புறுத்தியதாகக் கூறப்படுகிறது.

பாதிக்கப்பட்ட பெண்ணால் வழங்கப்பட்ட முறைப்பாட்டையடுத்து, உனவட்டுன சுற்றுலாப் பொலிஸார் தீவிர விசாரணைகளை முன்னெடுத்தனர். இதன் அடிப்படையில், குறித்த மசாஜ் நிலையத்தில் பணிபுரிந்த 38 வயதுடைய சந்தேக நபர் நேற்று (12) பொலிஸாரால் கைது செய்யப்பட்டார்.

கைது செய்யப்பட்ட சந்தேக நபர் இன்று (13) காலி நீதவான் நீதிமன்றத்தில் ஆஜர்ப்படுத்தப்படவுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இலங்கைக்கு வருகை தரும் சுற்றுலாப் பயணிகளின் பாதுகாப்பை உறுதி செய்யவும், இவ்வாறான சட்டவிரோத செயல்களில் ஈடுபடுவோருக்கு எதிராகக் கடுமையான சட்ட நடவடிக்கை எடுக்கவும் பொலிஸார் விசேட கவனம் செலுத்தி வருகின்றனர்.