இணைய மோசடி: 37 சீனர்கள் கைது

கொழும்பின் தலங்கம பகுதியில் சொகுசு பங்களா ஒன்றைக் குத்தகைக்கு எடுத்து, இரகசியமான முறையில் இயங்கி வந்த பாரிய சர்வதேச இணையதள மோசடி கும்பலை பொலிஸார் சுற்றிவளைத்துக் கைது செய்துள்ளனர்.

தலங்கம, கொஸ்வத்தை பகுதியில் அமைந்துள்ள வீடொன்றில் பெருமளவிலான சீனப் பிரஜைகள் தங்கியிருந்து மர்மமான முறையில் செயற்படுவதாக வலான மத்திய ஊழல் ஒழிப்புப் பிரிவினருக்கு இரகசியத் தகவல் கிடைத்தது. இதன்பேரில் முன்னெடுக்கப்பட்ட அதிரடிச் சோதனையின் போது, ஒரு பெண் உட்பட 37 சீனப் பிரஜைகள் பொலிஸாரால் கைது செய்யப்பட்டனர்.

பறிமுதல் செய்யப்பட்ட உபகரணங்கள்
கைது செய்யப்பட்டவர்கள் தங்கியிருந்த வீட்டைச் சோதனையிட்ட பொலிஸார், அங்கு ஒரு மினி 'கால் சென்டர்' (Call Center) போன்று அமைக்கப்பட்டிருந்த நவீனத் தொழில்நுட்பக் கூடத்தைக் கண்டு அதிர்ச்சியடைந்தனர். அங்கிருந்து பின்வரும் பொருட்கள் கைப்பற்றப்பட்டன:

35 டெஸ்க்டொப் கணினிகள்

37 நவீன டேப்லட்கள்

147 ஸ்மார்ட்போன்கள்

100 சிம் கார்டுகள்

கூடுதலாக 2,100 சட்டவிரோத சிகரெட்டுகளும் பறிமுதல் செய்யப்பட்டன.

கைது செய்யப்பட்ட சீனப் பிரஜைகள் அனைவரும் 3 மாத கால சுற்றுலா விசாவில் இலங்கைக்கு வந்துள்ளமை ஆரம்பக்கட்ட விசாரணைகளில் தெரியவந்துள்ளது. இவர்கள் தங்கியிருந்த காலப்பகுதியில்:

சர்வதேச ரீதியிலான பணப் பரிமாற்ற மோசடிகளில் ஈடுபட்டனரா? அல்லது ஹேக்கர்களாக (Hackers) செயற்பட்டு தரவுகளைத் திருடினார்களா? என்பது குறித்து குற்றப்புலனாய்வுத் திணைக்களம் (CID) தற்போது தீவிர விசாரணைகளை முன்னெடுத்து வருகின்றது.