காணாமல் போயிருந்த சிறுவன் 13 நாள்களின் பின்னர் சடலமாக மீட்பு

ரஞ்சித் ராஜபக்‌ஷ

கடந்த 13 நாள்களாக காணாமல் போயிருந்த 14 வயதுடைய சிறுவனொருவன் நானுஓயா ஆற்றிலிருந்து சடலமாக இன்று (29) மீட்கப்பட்டார்.

நானுஓயா- டெஸ்போர்ட் தோட்டத்தைச் சேர்ந்த குணசேகரன் சிவன்ராஜ் என்ற சிறுவன் இந்த மாதம் 16ஆம் திகதியிலிருந்து காணாமல் போயுள்ளாரென, அவரது பெற்றோரால் நானுஓயா பொலிஸ் நிலையத்தில் முறைப்பாடு செய்யப்பட்டிருந்தது.

இதனையடுத்து, நானுஓயா பொலிஸாரும், தோட்ட மக்களும் இணைந்து இச்சிறுவனைத் தேடும் நடவடிக்கையில் ஈடுபட்டிருந்த நிலையில், இன்று  காலை கொத்மலை ஓயாவுக்கு நீரைக் கொண்டுச் செல்லும் நானுஓயா ஆற்றின் மூங்கில் புதருக்கருகில் சிக்கியிருந்த நிலையில், சிறுவன் சடலமாக மீட்கப்பட்டுள்ளார்.

இந்தச் சம்பவம் தொடர்பில், நானுஓயா பொலிஸார் விசாரணைகளை முன்னெடுத்து வருவதாகத் தெரிவித்துள்ளனர்.