மோட்டார் சைக்கிளில் ஆபத்தாக பயணித்த 4 பெண்கள் கைது

தலைக்கவசம் இன்றி, ஒரே மோட்டார் சைக்கிளில் மூன்று இளம் பெண்கள் ஆபத்தான முறையில் பயணிக்கும் காணொளி சமூக வலைதளங்களில் வைரலானதை அடுத்து, அது தொடர்பாக நான்கு பெண்களை பசறை பொலிஸார் கைது செய்துள்ளனர்.

பொலிஸ் விசாரணை:

இந்தச் சம்பவம் பொதுமக்களிடையே பெரும் அதிருப்தியை ஏற்படுத்திய நிலையில், பொலிஸார் இது குறித்து உடனடி விசாரணைகளை ஆரம்பித்தனர். சமூக வலைதளங்களில் பரவிய காணொளியின் அடிப்படையில் விசாரணைகளை மேற்கொண்ட அதிகாரிகள், மோட்டார் சைக்கிளின் உரிமையாளர், அதனை ஓட்டிய பெண் மற்றும் பின்னால் பயணித்த இருவர் என நால்வரையும் அடையாளம் கண்டு கைது செய்தனர். இவர்கள் கொலம்பகே ஆர, இடிகிவுல மற்றும் உனவடுன ஆகிய பகுதிகளைச் சேர்ந்தவர்கள் எனத் தெரிவிக்கப்பட்டுள்ளது.

சுமத்தப்பட்டுள்ள குற்றச்சாட்டுகள்:

விசாரணையின் போது, மோட்டார் சைக்கிளை ஓட்டிய 23 வயதுடைய பெண்ணிடம் முறையான ஓட்டுநர் உரிமம் இல்லை என்பது கண்டறியப்பட்டது. அவர் மீது பின்வரும் குற்றச்சாட்டுகள் பதிவு செய்யப்பட்டுள்ளன:

முறையான ஓட்டுநர் உரிமம் இன்றி வாகனம் செலுத்தியமை.

மோட்டார் சைக்கிளில் ஒருவருக்கு மேற்பட்ட பயணிகளை ஏற்றிச் சென்றமை.

தலைக்கவசம் அணியாமல் பயணித்தமை.

அலட்சியமாகவும் ஆபத்தான முறையிலும் வாகனம் செலுத்தியமை.

உரிமையாளர் மீதான நடவடிக்கை:

ஓட்டுநர் உரிமம் இல்லாத ஒருவருக்குத் தனது வாகனத்தைச் செலுத்த அனுமதித்தமைக்காக, மோட்டார் சைக்கிளின் பதிவு செய்யப்பட்ட உரிமையாளருக்கு எதிராகவும் சட்ட நடவடிக்கை எடுக்கப்பட்டுள்ளதாக பொலிஸார் தெரிவித்தனர்.

கைது செய்யப்பட்ட வாகனத்தை ஓட்டிய பெண் மற்றும் அதன் உரிமையாளர் ஆகிய இருவரையும்  வெல்லவாய நீதவான் நீதிமன்றத்தில் முன்னிலைப்படுத்த பொலிஸார் நடவடிக்கை எடுத்துள்ளனர்.