மஹிந்த எம்.பி.யின் பாதுகாப்பு வாகன விபத்து: சாரதிக்குப் பிணை

குருநாகல் மாவட்ட நாடாளுமன்ற உறுப்பினரும் முன்னாள் ஜனாதிபதியுமான மஹிந்த ராஜபக்ஷவின் பாதுகாப்புப் பிரிவு வாகனம் விபத்துக்குள்ளானதுடன் தொடர்புடைய சாரதியான  இராணுவ வீரர் நிரோஷன் சேனாதீரவை, 5,000 ரூபாய் பெறுமதியான தனிப்பட்ட பிணையில் செல்ல எல்பிட்டிய மேலதிக நீதவான் முனிதாஸ ஹல்பந்தெனிய, நேற்று செவ்வாய்க்கிழமை(03) உத்தரவிட்டார்.

ஒரு பெண் உட்பட இருவர் படுகாயமடைந்து எல்பிட்டிய தள வைத்தியசாலையில் அனுமதிக்கப்பட்டு, பின்னர் மேலதிக சிகிச்சைகளுக்காக கராப்பிட்டிய வைத்தியசாலைக்கு மாற்றப்பட்டுள்ளதாக,  நீதிமன்றில் பொலிஸார் தெரிவித்தனர்.

கடந்த ஞாயிற்றுக்கிழமை(01) மஹிந்த ராஜபக்ஷவின் பாதுகாப்புப் பிரிவின் வாகனம், மோட்டார் சைக்கிள் ஒன்றுடன் மோதியதாலேயே இந்த விபத்து இடம்பெற்றது.

நாடாளுமன்ற உறுப்பினர் மஹிந்த ராஜபக்ஷ, மரண வீடொன்றுக்குச் செல்வதற்காக பொரவாகமைக்குச் சென்றுகொண்டிருந்த போது, எல்பிட்டிய, கெல்லபத்த பகுதியில் குறித்த விபத்து இடம்பெற்றதாகவும் பொலிஸார் குறிப்பிட்டனர்.