’’ஹரக் கட்டா’’ வுக்கு வழக்கு முடியும் வரை தடுப்பு காவல்

குற்றப்புலனாய்வு பிரிவின் காவலில் இருந்து தப்பிக்க சதி செய்தல் உள்ளிட்ட பல வழக்குகளில் பிரதிவாதியாக உள்ள சக்திவாய்ந்த போதைப்பொருள் கடத்தல்காரரான ‘ஹரக் கட்டா’எனப்படும் நதுன் சிந்தக விக்ரமரத்னவை வழக்கு விசாரணை முடியும் வரை பயங்கரவாத புலனாய்வுப் பணியகத்தின் காவலில் தங்காலை பழைய சிறைச்சாலையில் தடுத்து வைக்க பாதுகாப்புச் செயலாளர் முடிவு செய்துள்ளதாக சட்டமா அதிபர,  கொழும்பு மேல் நீதிமன்ற நீதிபதி சுஜீவ நிஸ்ஸங்கவின் கவனத்துக்கு திங்கட்கிழமை (08) கொண்டுவந்தார்.  

பயங்கரவாதத் தடுப்புச் சட்டத்தின் விதிகளின் அடிப்படையில், பிரதிவாதியான ‘ஹரக் கட்டா’வின் பாதுகாப்பைக் கருத்தில் கொண்டு, பாதுகாப்புச் செயலாளர் இந்த முடிவை எடுத்துள்ளதாக மூத்த அரசு வழக்கறிஞர் சஜித் பண்டார மேலும் தெரிவித்தார்.

வழக்கு விசாரணைக்கு வந்தபோது, ​​பிரதிவாதியான ஹரக் கட்டா, ஸூம் தொழில்நுட்பம் மூலம் நீதிமன்றத்துடன் இணைக்கப்பட்டார், அதே நேரத்தில் மற்ற நான்கு பிரதிவாதிகளும் சிறை அதிகாரிகளால் நீதிமன்றத்தில் ஆஜர்படுத்தப்பட்டனர்.

பிரதிவாதியின் தடுப்புக்காவல் உத்தரவு காலாவதியான பிறகு, பிரதிவாதியை விளக்கமறியலில் வைக்க முதலில் முடிவு செய்யப்பட்டிருந்தாலும், பிரதிவாதியின் பாதுகாப்பைக் கருத்தில் கொண்டு, பயங்கரவாதத் தடுப்புச் சட்டத்தின் விதிகளின் கீழ் விசாரணை முடியும் வரை அவரை தடுப்புக்காவல் உத்தரவின் கீழ் தடுத்து வைக்க முடிவு செய்யப்பட்டுள்ளதாக அரசு தரப்பு மூத்த வழக்கறிஞர் சஜித் பண்டார மன்றில் தெரிவித்தார்.

பிரதிவாதி ஹரக் கட்டா, தங்காலை பழைய சிறையில் பயங்கரவாத புலனாய்வுப் பணியகத்தின் காவலில் தொடர்ந்து தடுத்து வைக்கப்படுவார் என்று மூத்த அரசு வழக்கறிஞர் சஜித் பண்டார நீதிமன்றத்தின் கவனத்துக்கு கொண்டுவந்தார்.

பிரதிவாதியின் சார்பில் ஆஜரான வழக்கறிஞர் ஜாலிய சமரசிங்க, அரச வழக்கறிஞர் அறிவித்தலுக்கு கடும் ஆட்சேபனை தெரிவித்தார்.

தடுப்புக்காவல் உத்தரவு காலாவதியான பிறகும், விளக்கமறியலில் வைக்கத் தயாராக இருப்பதாக நீதிமன்றத்திற்கு முன்னர் தெரிவித்திருந்தாலும், சுமார் இரண்டு ஆண்டுகளாக தடுப்புக்காவல் உத்தரவின் கீழ் தடுத்து வைக்கப்பட்டிருந்த தனது கட்சிக்காரரை விசாரணை முடியும் வரை தடுத்து வைப்பது நியாயமில்லை என்று வழக்கறிஞர் ஜாலிய சமரசிங்க கூறினார். இந்த சூழ்நிலையில், தனது கட்சிக்காரர் நியாயமான விசாரணைக்கான உரிமையை இழப்பார் என்றும் அவர் சுட்டிக்காட்டினார்.

உண்மைகளை பரிசீலித்த நீதிபதி, விசாரணையை 24 ஆம் திகதிக்கு ஒத்திவைத்து, அன்றைய தினம் பிரதிவாதிகளை நீதிமன்றத்தில் ஆஜர்படுத்துமாறு சிறைச்சாலை கண்காணிப்பாளருக்கு உத்தரவிட்டார்.