கிழக்குமாகாண உள்ளூராட்சி சபைகளிலுள்ள வெற்றிடங்களை நிரப்ப நடவடிக்கை

(ஆர்.ஆனுருத்தன் )
 
கிழக்கு மாகாணத்திலுள்ள உள்ளூராட்சி சபைகளில் நிலவும் தொழில்நுட்ப உத்தியோகத்தர்கள் பதவிகளுக்கான வெற்றிடங்களை நிரப்ப கிழக்குமாகாண உள்ளூராட்சி திணைக்களம் தீர்மானித்துள்ளது.
 
இதன் பிரகாரம் முதற்கட்டமாக திருகோணமலை மாவட்ட உள்ளூராட்சி சபைகளிலுள்ள வெற்றிடங்கள் நேற்று வியாழக்கிழமை முதல் நிரப்பப்பட்டுள்ளன.
 
இம் மாவட்டத்திலுள்ள பிரதேசசபைகளில் கடமையாற்றுவதற்காக புதிதாக நியமிக்கப்பட்டுள்ள தொழில்நுட்ப உத்தியோகத்தர்களுக்கான நியமனக் கடிதங்களை, கிழக்குமாகாண முதலமைச்சர் சிவநேசதுரை சந்திரகாந்தன் அவரது அலுவலகத்தில் வைத்து கையளித்தார்.
 
கடந்த காலங்களில் குறித்த பிரதேசசபைகளில் நிலவிய தொழில்நுட்ப உத்தியோகத்தர் பதவி வெற்றிடங்கள் காரணமாக உள்ளூராட்சிசபை நிர்வாகங்கள் எதிர்நோக்கும் பிரச்சினைகள் குறித்து பிரதேசசபை தலைவர்கள், முதலமைச்சரின் கவனத்திற்கு கொண்டு வந்திருந்தமை இங்கு குறிப்பிடத்தக்கது.