காசோலை மோசடி: ஒருவருக்கு விளக்கமறியல்

எம்.முபாரக்

இருபது இலட்சம் ரூபாய் பெறுமதியான படகு ஒன்றைக் கொள்வனவு செய்வதற்காக, போலியான காசோலையை வழங்கிய சந்தேகநபரை, இம்மாதம்  15 ஆம் திகதி வரை விளக்கமறியலில் வைக்குமாறு, திருகோணமலை நீதவான் நீதிமன்ற நீதவான் விஸ்வானந்த பெர்ணாண்டோ, நேற்றுப் புதன்கிழமை (02) உத்தரவிட்டார். 

மன்னாரைச் சேர்ந்த 48 வயதுடைய ஒருவரே விளக்கமறியலில் வைக்கப்பட்டுள்ளார். குறித்த சந்தேகநபர், திருகோணமலையிலுள்ள நபரொருவரிடமிருந்து படகொன்றைக் கொள்வனவு செய்வதற்காக போலியான காசோலையை வழங்கி, படகைக் கொண்டு சென்றுள்ளார்.

படகின் உரிமையாளர், காசோலையை மாற்றுவதற்கு முயன்றபோது, காசோலை போலியானது எனத் தெரியவந்ததையடுத்து, திருகோணமலை குற்றத்தடுப்புப் பொலிஸாரிடம் முறைப்பாடு செய்துள்ளார்.

முறைப்பாட்டுக்கமைய, சந்தேகநபரை செவ்வாய்கிழமை (01) கைது செய்த பொலிஸார், அவரை,  திருகோணமலை நீதிமன்ற நீதவான் முன்னிலையில், புதன்கிழமை ஆஜர்படுத்திய போதே, நீதவான் மேற்கண்டவாறு உத்தரவிட்டார்.