10ஆம் இடத்திலிருந்து வென்ற வெர்ஸ்டப்பன்

ஹங்கேரியில் நேற்று முன்தினமிரவு நடைபெற்ற ஹங்கேரியன் குரான் பிறீயில், 10ஆம் இடத்திலிருந்து ஆரம்பித்த நடப்பு போர்மியுலா வண் சம்பியனான மக்ஸ் வெர்ஸ்டப்பன் வென்றார்.

ஒரு தடவை முன்னிலையிலிருந்து சுழன்று முன்னிலையை இழந்தபோதும் பெராரி அணியின் சார்ள்ஸ் லெக்கலெர்க்கை இரண்டு தடவைகள் முந்தியே வெர்ஸ்டப்பன் வென்றிருந்தார்.

இரண்டாமிடத்தை, பந்தயத்தை ஏழாமிடத்திலிருந்து ஆரம்பித்த மெர்சிடீஸ் அணியின் லூயிஸ் ஹமில்டனும், மூன்றாமிடத்தை பந்தயத்தை முதலாமிடத்திலிருந்து ஆரம்பித்த அதேயணியின் ஜோர்ஜ் ரஸலும் பெற்றிருந்தர்.

இந்நிலையில் இவ்வாண்டு போர்மியுலா வண் சம்பியன்ஷிப் புள்ளிகள் பட்டியலில் 258 புள்ளிகளுடன் முதலாமிடத்தில் நெதர்லாந்தின் வெர்ஸ்டப்பன் முதலாமிடத்திலுள்ளார். 178 புள்ளிகளுடன் இரண்டாமிடத்தில் மொனாக்கோவின் லெக்கலெர்க்கும், 173 புள்ளிகளுடன் மூன்றாமிடத்தில் றெட் புல் அணியின் சேர்ஜியோ பெரேஸும் காணப்படுகின்றனர்.