அவுஸ்திரேலியாவுக்கெதிரான இரண்டாவது டெஸ்டில் போராடும் பாகிஸ்தான்

அவுஸ்திரேலியாவுக்கெதிரான இரண்டாவது டெஸ்டில் பாகிஸ்தான் போராடி வருகின்றது.

மூன்று போட்டிகள் கொண்ட தொடரில், கராச்சியில் கடந்த சனிக்கிழமை ஆரம்பமான இப்போட்டியின் இன்றைய நான்காம் நாளை தமது இரண்டாவது இனிங்ஸில் ஒரு விக்கெட் இழப்புக்கு 81 ஓட்டங்களைப் பெற்றவாறு ஆரம்பித்த அவுஸ்திரேலியா, 2 விக்கெட்டுகளை இழந்து 97 ஓட்டங்களைப் பெற்ற நிலையில் இனிங்ஸை இடைநிறுத்தியது. மர்னுஸ் லபுஷைன் 44, உஸ்மான் கவாஜா ஆட்டமிழக்காமல் 44 ஓட்டங்களைப் பெற்றனர். ஷகீன் ஷா அஃப்ரிடி, ஹஸன் அலி ஆகியோர் தலா ஒவ்வொரு விக்கெட்டைக் கைப்பற்றினர்.

இந்நிலையில், 506 ஓட்டங்களை வெற்றியிலக்காகக் கொண்டு தமது இரண்டாவது இனிங்ஸில் துடுப்பெடுத்தாடிவரும் பாகிஸ்தான், இன்றைய நான்காம் நாள் முடிவில் 2 விக்கெட்டுகளை இழந்து 192 ஓட்டங்களைப் பெற்றுள்ளது. தற்போது களத்தில், அணித்தலைவர் பாபர் அஸாம் 102, அப்துல்லா ஷஃபிக் 71 ஓட்டங்களுடன் ஆட்டமிழக்காதுள்ளனர். நேதன் லையன், கமரொன் கிறீன் ஆகியோர் தலா ஒவ்வொரு விக்கெட்டைக் கைப்பற்றினர்.