கையில் புதிய டாட்டூ: ’கிங்’ கோலியின் பின்னணி என்ன?

ஐபிஎல் (IPL 2026) சீசன் தொடங்குவதற்கு முன்னதாக, ராயல் சேலஞ்சர்ஸ் பெங்களூரு அணியின் நட்சத்திர வீரர் விராட் கோலி, தனது இடது கையில் புதிய டாட்டூ ஒன்றை வரைந்துள்ளார். 'அலியன்ஸ் டாட்டூ இந்தியா' (Aliens Tattoo India) நிறுவனத்தால் வடிவமைக்கப்பட்டுள்ள இந்த டாட்டூ, தற்போது சமூக வலைதளங்களில் வைரலாகி வருகிறது.

இந்த டாட்டூ குறித்துத் தகவல் பகிர்ந்துள்ள அந்த நிறுவனம், இது இன்னும் முழுமையடையவில்லை என்று தெரிவித்துள்ளது. விராட் கோலி தனது பிஸியான கால அட்டவணைக்கு மத்தியிலும், நேரம் கிடைக்கும்போதெல்லாம் சில மணிநேரங்களை ஒதுக்கி இந்த டாட்டூவைச் செதுக்கி வருகிறார். தற்போது வரை வரையப்பட்டுள்ள பகுதி இன்னும் முழுமையாகக் குணமடையவில்லை என்பதும் குறிப்பிடத்தக்கது.

மார்ச் 28 அன்று எம்.சின்னசாமி மைதானத்தில் சன்ரைசர்ஸ் ஹைதராபாத் அணிக்கு எதிராக நடைபெறவுள்ள பெங்களூருவின் முதல் போட்டிக்கு கோலி தீவிரமாகத் தயாராகி வருகிறார். இந்த நிலையில், அவரது புதிய டாட்டூ வெறும் உடல் அலங்காரம் மட்டுமல்ல, அது அவரது தனிப்பட்ட வாழ்க்கைப் பயணத்தைப் பிரதிபலிப்பதாக டாட்டூ ஸ்டுடியோ தெரிவித்துள்ளது.

கோலியின் பல ஆண்டுகால வளர்ச்சி மற்றும் அனுபவங்களை ஒருங்கிணைக்கும் வகையில் இந்த டாட்டூ வடிவமைக்கப்பட்டுள்ளது.

இது அவரது கடந்தகால அனுபவங்களையும் தற்போதைய மனநிலையையும் ஒரு கலைப்படைப்பாக வெளிப்படுத்துகிறது.

ஒரு தனி வடிவமைப்பாக இல்லாமல், அவரது உடலிலுள்ள மற்ற டாட்டூக்களுடன் இணைந்து ஒரு கதையைச் சொல்லும் விதமாக இது உருவாக்கப்பட்டுள்ளது.

விராட் கோலியின் இந்த புதிய மாற்றம், களத்தில் அவரது ஆக்ரோஷமான ஆட்டத்திற்கு முன்னதாக ரசிகர்களிடையே பெரும் எதிர்பார்ப்பை ஏற்படுத்தியுள்ளது.