சிற்றி, செல்சி, ஆர்சனல் வென்றன

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், நேற்று இடம்பெற்ற போட்டிகளில், மன்செஸ்டர் சிற்றி, செல்சி, ஆர்சனல், லிவர்பூல், பேர்ண்லி, எவெர்ற்றன் ஆகிய அணிகள் வெற்றி பெற்றுள்ளன.

மன்செஸ்டர் சிற்றி, பிறீமியர் லீக் புள்ளிகள் தரவரிசையில் முதலிடத்திலிருக்கும் மன்செஸ்டர் சிற்றி, 2-1 என்ற கோல் கணக்கில் செளதாம்டனை வென்றது. மன்செஸ்டர் சிற்றி சார்பாக, கெவின் டி ப்ரூனே, ரஹீம் ஸ்டேர்லிங் ஆகியோர் தலா ஒவ்வொரு கோலைப் பெற்றிருந்தனர். செளதாம்டன் சார்பாகப் பெறப்பட்ட கோலை ஒறியோல் றொமேயு பெற்றார்.

நடப்பு பிறீமியர் லீக் சம்பியன்களான செல்சி, 1-0 என்ற கோல் கணக்கில் சுவான்சீ சிற்றியை வென்றது. செல்சி சார்பாகப் பெறப்பட்ட கோலை அன்டோனியோ ருடிகர் பெற்றார்.

ஆர்சனல், 5-0 என்ற கோல் கணக்கில் ஹட்டர்ஸ்பீல்ட் டெளணை வென்றது. ஆர்சனல் சார்பாக, ஒலிவர் ஜிரோட் இரண்டு கோல்களையும் அலெக்ஸான்ரே லகஸ்ரே, அலெக்ஸிஸ் சந்தேஸ், மெசுட் ஏஸில் ஆகியோர் தலா ஒவ்வொரு கோலைப் பெற்றனர்.

லிவர்பூல், 3-0 என்ற கோல் கணக்கில் ஸ்டோக் சிற்றியை வென்றது. லிவர்பூல் சார்பாக மொஹமட் சாலா 2 கோல்களையும் சாடியோ மனே ஒரு கோலையும் பெற்றனர்.

பேர்ண்லி, 2-1 என்ற கோல் கணக்கில் ஏ.எப்.சி போர்ண்மெத்தை வென்றது. பேர்ண்லி சார்பாக, கிறிஸ் வூட், றொபி பிராடி ஆகியோர் தலா ஒவ்வொரு கோலைப் பெற்றனர். ஏ.எப்.சி போர்ண்மெத் சார்பாகப் பெறப்பட்ட கோலை ஜோஷுவா கிங் பெற்றார்.

எவெர்ற்றன், 4-0 என்ற கோல் கணக்கில் வெஸ்ட் ஹாம் யுனைட்டெட்டை வென்றது. எவெர்ற்றன் சார்பாக வெய்ன் றூணி 3 கோல்களையும் அஷ்லி வில்லியம்ஸ் ஒரு கோலையும் பெற்றனர்.