சூட்டில் தங்கம் வென்ற முதலாவது இந்திய வீராங்கனையானார் ரஹி சர்னோபட்

ஆசிய விளையாட்டுப் போட்டிகளின் சூட்டுப் போட்டிகளில் தங்கம் வென்ற முதலாவது இந்திய வீராங்கனையாக தனது பெயரை ரஹி சர்னோபட் இன்று பதிந்து கொண்டார்.

இந்தோனேஷியாவின் தலைநகர் ஜகார்த்தா, பலெம்பாங்கில் இடம்பெற்றுவரும் 18ஆவது ஆசிய விளையாட்டுப் போட்டிகளின் 25 மீற்றர் எயார் பிஸ்டல் நிகழ்வில் தங்கப் பதக்கத்தை வென்றதன் மூலமே ஆசிய விளையாட்டுப் போட்டிகளின் சூட்டுப் போட்டிகளில் தங்கம் வென்ற முதலாவது இந்திய வீராங்கனையாக தனது பெயரை ரஹி சர்னோபட் பதிந்து கொண்டார்.

குறித்த நிகழ்வில், தலா ஐந்து சூட்டுக்களைக் கொண்ட 10 தொடரைத் தொடர்ந்து ரஹி சர்னோபட்டும் தாய்லாந்தின் நபஸ்வன் யங்பைபூனூம் தலா 34 புள்ளிகளைப் பெற்றிருந்தனர். இதனையடுத்து இடம்பெற்ற இருவருக்குமிடையேயான போட்டியில் இருவரும் நான்கு தடவைகள் இலக்கௌ நோக்கி சுட்டிருந்தனர். பின்னர் மீண்டும் இருவருக்குமிடையில் இடம்பெற்ற போட்டியில் ரஹி சர்னோப் மூன்று இலக்குகளை சுட்டதோடு, நபஸ்வன் யங்பைபூன் இரண்டு இலக்குகளை சுட, ரஹி சர்னோப் தங்கப் பதக்கத்தை வெல்ல நபஸ்வன் யங்பைபூன் வெள்ளிப் பதக்கத்தை வென்றிருந்தார். 29 புள்ளிகளைப் பெற்ற தென்கொரியாவின் கிம் மின்ஜுங் வெண்கலப் பதக்கத்தைப் பெற்றிருந்தார்.

இந்நிலையில், பெண்களுக்கான 68 கிலோமிராம் பிரிவு மல்யுத்தத்தில் இந்தியாவின் டிவ்ரா கக்ரன் நேற்று  வெண்கலப் பதக்கத்தைப் பெற்றிருந்ததுடன், ஆண்களுக்கான அணி செபக் டக்ரோவிலும் இந்தியா வெண்கலப் பதக்கத்தைப் பெற்றிருந்தது.