டென்னிஸின் முதல் 100 மில்லியன் டொலர் அதிபதி யார்?

டென்னிஸ் வரலாற்றில் 100 மில்லியன் அமெரிக்க டொலர்களை, பரிசுப் பணமாக வென்ற முதலாவது வீரராக மாறுவதற்கு, உலகின் முதல்நிலை வீரர் நொவக் ஜோக்கோவிச்சும், முன்னாள் முதல்நிலை வீரரும் தற்போதைய மூன்றாம் நிலை வீரருமான ரொஜர் பெடரரும், போட்டியை எதிர்கொண்டுள்ளனர்.

28 வயதான ஜோக்கோவிச், 94 மில்லியன் ஐக்கிய அமெரிக்க டொலர்களை பரிசுப் பணமாக வென்றுள்ளார். ஜோக்கோவிச்சை விட 6 வயது அதிகமான ரொஜர் பெடரர், 97.3 மில்லியன் ஐக்கிய அமெரிக்க டொலர்களை பரிசுப் பணமாகக் கொண்டுள்ளார்.

அடுத்தாண்டு ஆரம்பத்தில் இடம்பெறவுள்ள அவுஸ்திரேலிய பகிரங்க டென்னிஸ் தொடரின் வெற்றியாளருக்கு, 3.85 மில்லியன் ஐக்கிய அமெரிக்க டொலர்கள், பரிசுப் பணமாக வழங்கப்பட்டுள்ளது. இதன்படி, அவுஸ்திரேலிய  பகிரங்க டென்னிஸ் தொடரை பெடரர் வெற்றிகொண்டால், 100 மில்லியன் ஐக்கிய அமெரிக்க டொலர் மைல்கல்லை முதலில் அடைந்துகொள்வார்.

மாறாக, முதல்நிலை வீரரான ஜோக்கோவிச், அடுத்தாண்டு இடம்பெறவுள்ள 4 பகிரங்க டென்னிஸ் தொடர்களிலும் சிறப்பாகச் செயற்படும் வாய்ப்புள்ள நிலையில், இந்த மைல்கல்லை இலகுவாக அடைவார் என எதிர்பார்க்கப்படுகிறது. எனவே, யார் முதலில் அடைவது என்பதில், கடுமையான போட்டி நிலவுகின்றது.