தொடரை இழந்தது இலங்கை

இங்கிலாந்து, இலங்கை அணிகளுக்கிடையிலான 5 போட்டிகள் கொண்ட ஒருநாள் சர்வதேசப் போட்டித் தொடரின் 4ஆவது போட்டியில், மோசமான பந்துவீச்சை வெளிப்படுத்திய இலங்கை அணி, அந்தத் தொடரை வெல்லும் வாய்ப்பையும் தரப்படுத்தலில் முன்னேறும் வாய்ப்பையும் இழந்துள்ளது.

இலண்டன் ஓவல் மைதானத்தில் இடம்பெற்ற இப்போட்டியில்முதலில் துடுப்பெடுத்தாடப் பணிக்கப்பட்ட இலங்கை அணி, 42 ஓவர்களில் 5 விக்கெட்டுகளை இழந்து 305 ஓட்டங்களைப் பெற்றது. 50 ஓவர்களாக ஆரம்பித்த இப்போட்டியில் 18.1 ஓவர்களில் ஒரு விக்கெட்டை இழந்து 127 ஓட்டங்களுடன் இலங்கை பலமான நிலையில் காணப்பட்டபோது, மழை குறுக்கிட்டது. கணிசமான நேரம் இழக்கப்பட, 42 ஓவர்கள் கொண்ட போட்டியாக மாறியது.

துடுப்பாட்டத்தில் குசால் மென்டிஸ் 77 (64), அஞ்சலோ மத்தியூஸ் ஆட்டமிழக்காமல் 67 (54), டினேஷ் சந்திமால் 63 (51), தனுஷ்க குணதிலக 62 (64) ஓட்டங்களைப் பெற்றனர். பந்துவீச்சில் டேவிட் வில்லி, அடில் றஷீத் இருவரும் தலா 2 விக்கெட்டுகளைக் கைப்பற்றினர்.

இங்கிலாந்து அணிக்கு டக்வேர்த் லூயிஸ் ஸ்டேர்ண் முறையில் 42 ஓவர்களில் 308 என்ற இலக்கு வழங்கப்பட்டது. இலங்கை அணி தனது முதல் 18.1 ஓவர்களை, 50 ஓவர்கள் கொண்ட போட்டியாக எண்ணி விளையாடியிருந்த நிலையில், இங்கிலாந்து அணிக்கான இலக்கு, இன்னமும் அதிகமாக இருந்திருக்க வேண்டுமென்ற கருத்து நிலவியது. ஆனால், இந்த இலக்கே, சவாலான இலக்கெனக் கருதப்படுகிறது.

இதன்படி துடுப்பெடுத்தாடிய இங்கிலாந்து, முதலாவது விக்கெட்டை 18 ஓட்டங்களுக்கு இழந்தபோது, இலங்கைக்கு நம்பிக்கை பிறந்த போதிலும், 2ஆவது விக்கெட்டுக்காக 149 ஓட்டங்கள் பகிரப்பட்டு, இலங்கையின் நம்பிக்கை சிதறடிக்கப்பட்டது.

துடுப்பாட்டத்தில் ஜேஸன் றோய் அதிரடியாக விளையாடி, 162 (118), ஜோ றூட் 65 (54) ஓட்டங்களைப் பெற்றனர். பந்துவீச்சில் நுவான் பிரதீப் 2 விக்கெட்டுகளைக் கைப்பற்றிய போதிலும், ஓட்டங்களை விட்டுக் கொடுத்தார். தனுஷ்க குணதிலக மாத்திரம், ஓரளவு கட்டுப்பாடாக வீசி, ஒரு விக்கெட்டைக் கைப்பற்றினார்.

இப்போட்டியின் நாயகனாக, ஜேஸன் றோய் தெரிவானார்.

இந்தப் போட்டியிலும் வென்று, ஞாயிற்றுக்கிழமை இடம்பெறவுள்ள போட்டியிலும் வென்றால், இந்தத் தொடரை இலங்கை அணி கைப்பற்றியிருக்க முடியும் என்பதோடு, ஒருநாள் சர்வதேசப் போட்டித் தரவரிசையில் ஓரிடம் முன்னேறி, 5ஆவது இடத்துக்கு முன்னேறியிருக்க முடியுமென்பது குறிப்பிடத்தக்கது.