நியூசிலாந்துக்கெதிரான 2ஆவது டெஸ்டில் தடுமாறுகிறது மே. தீவுகள்

நியூசிலாந்து, மேற்கிந்தியத் தீவுகள் அணிகளுக்கிடையிலான இரண்டு போட்டிகள் கொண்ட டெஸ்ட் தொடரில், ஹமில்டனில் கடந்த சனிக்கிழமை ஆரம்பித்த இரண்டாவது டெஸ்டின் இன்றைய மூன்றாவது நாள் ஆட்ட முடிவில் தமது இரண்டாவது இனிங்ஸில் துடுப்பெடுத்தாடிவரும் மேற்கிந்தியத் தீவுகள் அணி தடுமாறி வருகிறது.

444 ஓட்டங்கள் என்ற வெற்றியிலக்குடன் தமது இரண்டாவது இனிங்ஸில் துடுப்பெடுத்தாடிய வருகின்ற மேற்கிந்தியத் தீவுகள், இன்றைய ஆட்டநேர முடிவின்போது 2 விக்கெட் இழப்புக்கு 30 ஓட்டங்களைப் பெற்று தடுமாறி வருகிறது. இப்போட்டியில் மேற்கிந்தியத் தீவுகள் அணிக்கு தலைவராகக் கடமையாற்றும் கிரேய்க் பிறத்வெய்ட் 13 ஓட்டங்களுடனும் ஷை ஹோப் ஓர் ஓட்டத்துடனும் ஆட்டமிழக்காமல் களத்திலுள்ளனர். பந்துவீச்சில், ட்ரெண்ட் போல்ட், டிம் செளதி ஆகியோர் தலா ஒவ்வொரு விக்கெட்டைக் கைப்பற்றினர்.

முன்னதாக, தமது இரண்டாவது இனிங்ஸில் துடுப்பெடுத்தாடிய நியூசிலாந்து, 8 விக்கெட்டுகளை இழந்து 291 ஓட்டங்களைப் பெற்ற நிலையில் தமது ஆட்டத்தை இடைநிறுத்தியிருந்தது. துடுப்பாட்டத்தில், றொஸ் டெய்லர் ஆட்டமிழக்காமல் 107, அணித்தலைவர் கேன் வில்லியம்சன் 54 ஓட்டங்களைப் பெற்றனர். பந்துவீச்சில், மிக்கேல் கமின்ஸ் 3, றொஸ்டன் சேஸ், ஷனோன் கப்ரியல் ஆகியோர் தலா 2 விக்கெட்டுகளைக் கைப்பற்றினர்.

மேற்கிந்தியத் தீவுகள் அணி, தமது முதலாவது இனிங்ஸில் சகல விக்கெட்டுகளையும் இழந்து 221 ஓட்டங்களையே பெற்றது. துடுப்பாட்டத்தில், கிரேய்க் பிறத்வெய்ட் 66, ஷேன் டெளரிச் 35 ஓட்டங்களைப் பெற்றனர். பந்துவீச்சில், ட்ரெண்ட் போல்ட் 4, டிம் செளதி, கொலின் டி கிரன்ட்ஹொம், நீல் வக்னர் ஆகியோர் தலா 2 விக்கெட்டுகளைக் கைப்பற்றினர்.

முதலில் துடுப்பெடுத்தாடிய நியூசிலாந்து, தமது முதலாவது இனிங்ஸில் சகல விக்கெட்டுகளையும் இழந்து 373 ஓட்டங்களைப் பெற்றது. துடுப்பாட்டத்தில், ஜீட் றாவல் 84, கொலின் டி கிரன்ட்ஹொம் 58, அணித்தலைவர் கேன் வில்லியம்சன் 43, ட்ரெண்ட் போல்ட் ஆட்டமிழக்காமல் 37, டிம் செளதி 31 ஓட்டங்களைப் பெற்றனர். பந்துவீச்சில், ஷனோன் கப்ரியல் 4, கேமார் றோச் 3, மிக்கேல் கமின்ஸ் 2 விக்கெட்டுகளைக் கைப்பற்றினர்.