கட்டுத் துப்பாக்கியுடன் ஒருவர் கைது

எம்.எம்.அஹமட் அனாம்

வாழைச்சேனை பொலிஸ் பிரிவுக்குட்பட்ட வாகனேரி, குளத்துமடு பகுதியில், கட்டுத் துப்பாக்கியுடன் 37 வயதுடைய குடும்பஸ்தர் ஒருவர், இன்று (03) கைது செய்யப்பட்டுள்ளாரென, வாழைச்சேனை பொலிஸ் நிலையப் பொறுப்பதிகாரி தனஞ்ஜய பெரமுன தெரிவித்தார்.

வாழைச்சேனை விசேட அதிரடிப்படைப் படையினருக்கு கிடைத்த இரகசிய தகவலையடுத்து, விசேட அதிரடிப் படையின் பொறுப்பதிகாரி ஏ.எஸ்.பிரேமரத்ன வழிகாட்டலில், விசேட அதிரடிப் படையினரால் மேற்கொள்ளப்பட்ட  சுற்றிவளைப்பில் இக்குடும்பஸ்தர் கைதுசெய்யப்பட்டுள்ளார். 

வீடொன்றில் மறைத்து வைக்கப்பட்டிருந்த நிலையில் கட்டுத் துப்பாக்கியும் அதற்குப் பயன்படுத்தும் ஈயக் குண்டுகளுடன் இவர் கைது செய்யப்பட்டுள்ளார். 

கட்டுத் துப்பாக்கி, ஈயக் குண்டுகள் சகிதம் கைதுசெய்யப்பட்ட  சந்தேகநபரை, வாழைச்சேனை பொலிஸாரிடம் வாழைச்சேனை விசேட அதிரடிப்படைப் படையினர் ஒப்படைத்துள்ளதாக, வாழைச்சேனை பொலிஸ் நிலைய பொறுப்பதிகாரி மேலும் தெரிவித்தார்.