துப்பாக்கிச்சூட்டுக்கு இலக்காகிய யானை இ​றப்பு

ஆர்.ஜெயஸ்ரீராம், எம்.எம்.அஹமட் அனாம், வா.கிருஸ்ணா

மட்டக்களப்பு, வாகரையில் காட்டு யானையொன்று, துப்பாக்கிச்சூட்டு காயத்துக்கு இலக்காகி இறந்துள்ளதென, பொலிஸார் தெரிவித்தனர்.

வாகரை, தோணிதாண்டமடு வயல்வெளி பிரதேசத்தில் மக்களின் குடியிருப்புகள் அமைந்துள்ள பகுதியில் இருந்து சுமார் 80 மீற்றருக்கு அப்பால், பெண் யானையொன்று காயமடைந்த நிலையில்  சோர்வுற்று, நடக்கமுடியாதவாறு, கடந்த ஞாயிற்றுக்கிழமையன்று மயங்கி விழுந்துள்ளது.

இதனைக் கண்ட பொதுமக்கள், பிரதேச வன ஜீவராசிகள் திணைக்களத்தினருக்கு தகவல் வழங்கியதை அடுத்து,  சம்பவ இடத்துக்கு விரைந்த வன ஜீவராசிகள் திணைக்களத்தினர், அதனைக் குணப்படுத்தும் முகமாக மருத்துவ சிகிச்சையளித்து வந்துள்ளனர்.

எனினும், சிகிச்சை பலனின்றிப் போனதால் நேற்று (23) மாலை 3 மணியளவில் குறித்த  யானை இறந்துள்ளதென, வாகரை பொலிஸார் தெரிவித்தனர்.

சுகாதர பிரச்சினைகள் காரணமாக யானையின் உடலத்தை குறித்த பிரதேசத்தில் இருந்து விரைவில் அகற்றும் நடவடிக்கையில் வன ஜீவராசிகள் திணைக்கள அதிகாரிகளும் பொலிஸாரும் செயற்பட்டு வருகின்றனர்.  

இதேவேளை, மட்டக்களப்பு நகரில் இருந்து சுமார் 70 கிலோ மீற்றருக்கு அப்பாலுள்ள எல்லைக் கிராமமான தோணிதாட்டமடு பிரதேசத்துக்கு, இதுவரை காலமும் யானை பாதுகாப்பு மின்வேலி அமைத்துத் தரப்படவில்லை என மக்கள் விசனம் தெரிவிக்கின்றனர்.