ஓல்டன் தொழிலாளர்கள் ஆர்ப்பாட்டம்

எம்.கிருஸ்ணா

ஓல்டன் தோட்ட முகாமையாளர் மற்றும் உதவி முகாமையாளரை இடமாற்றம் செய்யுமாறுக் கோரி, ஒல்ட்டன் மேற்பிரிவு கீழ்பிரிவு, கிங்கோரா, நிலாவத்தை பிரிவுகளைச் சேர்ந்த சுமார் 650 தொழிலாளர்கள் பணிபகிஷ்கரிப்பில் ஈடுபட்டு வருவதுடன் இன்று (18) ஆர்ப்பாட்டத்திலும் ஈடுபட்டுள்ளனர்.

தொழிலாளர்களின் பணிப்பகிஷ்கரிப்பு காரணமாக, தோட்டத் தேயிலைத் தொழிற்சாலையும் மூடப்பட்டிருப்பதாக தெரிய வருகின்றது.

தோட்டத் தொழிலாளர்களுக்கான 1,000 ரூபாய் சம்பள உயர்வை வலியுறுத்தி, இலங்கை தொழிலாளர் காங்கிரஸ், கடந்த 5ஆம் திகதி ஒருநாள் அடையாள வேலைநிறுத்தப் போராட்டத்துக்கு அழைப்பு விடுத்திருந்தது. 

இந்நிலையில், ஓல்ட்டன் தோட்டத் தேயிலை தொழிற்சாலையிலிருந்து பொதிசெய்யப்பட்ட தேயிலை தூள்களை தோட்ட நிர்வாகம், கடந்த 3ஆம் திகதி எடுத்துச்செல்ல முற்பட்டபோது அதனை வெளியேற்றவிடாது தொழிலாளர்கள் எதிர்ப்பை தெரிவித்தனர்.

இதன்போது, தோட்ட முகாமையாளர்  பெண் தொழிலாளி ஒருவரை தாக்கியநிலையில் குறித்த பெண், மஸ்கெலியா வைத்தியசாலையில் அனுமதிக்கப்பட்டார். 

இந்நிலையில் தோட்ட முகாமையாளரையும் உதவி முகாமையாளரையும் இடமாற்றம் செய்யுமாறுக் கோரி, கடந்த 3ஆம் திகதி முதல் தொழிலாளர்கள் பணிப்பகிஷ்கரிப்பில் ஈடுபட்டு வருகின்றனர்.

தோட்ட நிர்வாகமானது, 16 ஆம் திகதி வெளியாரை அழைத்துவந்து கொழுந்து பறிக்கச் செய்ய முற்பட்டபோது, தொழிலாளர்கள் வெளியாரை விரட்டியடித்துள்ளதுடன், தோட்ட முகாமையாளரின் விடுதிக்குச் சென்று வாக்குவாதத்தில் ஈடுபட்டுள்ளனர்.

இதன்போது தோட்ட முகாமையாளரும் உதவி முகாமையாளரும்
தொழிலாளர்களால் தாக்கப்பட்டதாக கூறி மஸ்கெலியா பொலிஸ் நிலையத்தில் முறைப்பாடு செய்யப்பட்டுள்ளதுடன் முகாமையாளர்கள் இருவரும் கிளங்கள் வைத்தியசாலையில் அனுமதிக்கப்பட்டுள்ளனர்.

முகாமையாளர்களின் முறைப்பாட்டுக்கமைய ஒரு ஆண் தொழிலாளியும் 7 பெண் தொழிலாளர்களையும் மஸ்கெலியா பொலிஸார் கைதுசெய்துள்ளதுடன் இவர்களை இன்று நீதிமன்றில் முன்னிலைப் படுத்தினர். 

இச்சம்பவத்துக்கு எதிர்ப்புத் தெரிவித்தே தொழிலாளர்கள் இன்று (18) ஆர்ப்பாட்டத்தில் ஈடுபட்டனர்.