விபத்தில் சாரதி படுகாயம்: பழக்கடை சேதம்

ரஞ்சித் ராஜபக்ஷ, மு.இராமச்சந்திரன்

மலையகத்தின் இருவேறு பகுதிகளில் இடம்பெற்ற இரு விபத்துக்களில், ஒருவர் காயமடைந்துள்ளதுடன் பழக்கடையொன்றும் சேதமாகியுள்ளது.

மஸ்கெலியாவிலிருந்து ஹட்டன் நோக்கி யோகட் வகைகளை ஏற்றிச்சென்ற சிறிய ரக லொறி, திங்கட்கிழமை (29) இரவு நோர்வூட், ரொக்வூட் பகுதியில் 20 அடி பள்ளத்தில் பாய்ந்து விபத்துக்குள்ளாகியது.

விபத்தில் லொறியின் சாரதி காயமடைந்த நிலையில் டிக்கோயா மாவட்ட வைத்தியசாலையில் அனுமதிக்கப்பட்டுள்ளார்.

எதிரே வந்த வாகனத்துக்கு, இடமளிக்க முற்பட்ட போதே இவ்விபத்து இடம்பெற்றுள்ளதென நோர்வூட் பொலிஸார் தெரிவித்தனர்.

இதேவேளை, ஹட்டனிலிருந்து நுவரெலியா நோக்கிச் சென்ற அரை சொகுசு பஸ்ஸொன்று, நேற்று (01) காலை ஹட்டன் நகரிலுள்ள பழக்கடை மீது மோதி விபத்துக்குள்ளாகியுள்ளது.

இயந்திரக்கோளாறே இதற்கு காரணமென பொலிஸார் தெரிவித்தனர். இவ்விபத்தில் ஒருவருக்கும் எவ்வித பாதிப்பும் ஏற்படவில்லை எனவும் பழக்கடை சிறிதளவு சேதமடைந்துள்ளதாகவும் ஹட்டன் பொலிஸார் மேலும் தெரிவித்தனர்.