எதிர்கட்சியின் தீப்பந்த பேரணியில் குண்டர்களின் தடியடி

இன்று மாலை புஞ்சிபொறளையில் பிரதான எதிர்க்கட்சியினால் ஏற்பாடு செய்யப்பட்ட தீப்பந்த பேரணியில் குண்டர்கள் தடியடி பிரயோகம் செய்ததில் பலர் படுகாயமடைந்துள்ளனர்.

சிறையில் அடைக்கப்பட்டுள்ள முன்னாள் இராணுவ தளபதி சரத் பொன்சேகாவை விடுதலை செய்யக்கோரி, புஞ்சிபொறளை சந்தியிலிருந்து வெலிக்கடை சிறைச்சாலைவரை தீப்பந்த பேரணியொன்றினை எதிர்க்கட்சி ஏற்பாடு செய்திருந்தது. இந்த பேரணி ஆரம்பமாகிய சிறிது நேரத்தில் பேரணிக்குள் புகுந்த குண்டர்கள் தடியடி பிரயோகத்தினை மேற்கொண்டனர். இத்தாக்குதலினால் பேரணியில் கலந்துகொண்ட பலர் படுகாயமடைந்து வைத்தியசாலையில் அனுமதிக்கப்பட்டுள்ளனர்.

பேரணியில் செய்தி சேகரிக்கச்சென்ற ஊடகவியலாளர்கள் சிலரும் இத்தாக்குதலுக்கு இலக்காகியுள்ளனர். இலத்திரனியல் ஊடகங்களைச் சேர்ந்த ஊடகவியலாளர்கள் சிலரது ஒளிப்பதிவு கருவிகளும் சுக்குநூறாக்கப்பட்டமை குறிப்பிடத்தக்கது.

இத்தாக்குதல் தொடர்பாக ஐ.தே.கட்சியின் பிரதித்தலைவர் கரு ஜயசூரிய கருத்துத் தெரிவிக்கையில்... ''காலையில் கதிர்காமத்தில் நாட்டு மக்களின் சுதந்திர தினக் கொண்டாட்டம் நிகழ்ந்தது. மாலையில் குண்டர்களின் 'சுதந்திர கொண்டாட்டம்' புஞ்சிபொறளையில் இடம்பெற்றுள்ளது'' என்று குறிப்பிட்டுள்ளார்.

இத்தாக்குதல் சம்பவம் தொடர்பாக பொலிஸார் மேலதிக விசாரணைகளை மேற்கொண்டு வருகின்றனர். Pix: Samantha Perera