விருதோடையில் சுகாதார சிகிச்சை நிலையம் திறந்து வைப்பு

(எஸ்.எம்.மும்தாஜ், எம்.என்.எம்.ஹிஜாஸ்)

முந்தல் பிரதேச செயலகத்திற்குட்பட்ட விருதோடைக் கிராமத்தில் வசதிகளுடன் புனரமைப்புச் செய்யப்பட்ட கர்ப்பிணித் தாய் மற்றும் குழந்தைகளுக்கான வைத்திய சிகிச்சை நிலையம் இன்று திறந்து வைக்கப்பட்டது.

புத்தளம் மாவட்ட நாடாளுமன்ற உறுப்பினரும், முந்தல் பிரதேச அபிவிருத்திக் குழுத் தலைவருமான விக்டர் என்டணி பெரேரா மற்றும் முன்னாள் வடமேல் மாகாண சுகாதார அமைச்சர் எம்.எச்.எம்.நவவி ஆகியோர் அதிதிகளாகக் கலந்து கொண்டு இந்நிலையத்தினைத் திறந்து வைத்தனர்.

மிக நீண்ட காலமாக போதிய இட மற்றும் ஏனைய வசதிகளின்றி சிறியதோர் இடத்தில் இயங்கி வந்த இந்த சிகிச்சை நிலையத்தினை புனரமைப்புச் செய்வதற்காக கற்பிட்டி பிரதேச சபை உறுப்பினர் எஸ்.எச்.எம்.முஸம்மில் பொருளாதார அபிவிருத்தி அமைச்சர் பெசில் ராஜபக்ஷவிடம் விடுத்த வேண்டுகோளின் பேரில் இதன் புனரமைப்புப் பணிகளுக்கென சுமார் எட்டறை இலட்சம் ரூபாய் ஒதுக்கிடப்பட்டு பணிகள் முன்னெடுக்கப்பட்டன.

இந்நிகழ்வில் முந்தல் பிரதேச சுகாதார வைத்திய அதிகாரி டாக்டர் எஸ்.ருவன் உட்பட பிரதேச முக்கியஸ்தர்கள் மற்றும் தாய்மார்கள் பலரும் கலந்து கொண்டனர்.