யாழ். மாநாகரசபைக் கூட்டத்திலிருந்து முஸ்லிம் பிரதிநிதிகள் வெளிநடப்பு

(கவிசுகி)
முஸ்லிம் சமூகத்தின் பிரச்சினைகளுக்கு தீர்வு காணப்பட வேண்டும் என வலியுறுத்தி, யாழ். மாநகர சபை முஸ்லிம் பிரதிநிதிகள் இன்றைய சபைக் கூட்டத்திலிருந்து வெளிநடப்புச் செய்தனர்.

யாழ். மாநகர சபையின் இன்றைய கூட்டம் யாழ். மாநகர முதல்வர் திருமதி யோகேஸ்வரி பற்குணராஜா தலைமையில் இன்று வியாழக்கிழமை காலை  நடைபெற்றது.

கூட்டத்தின் ஆரம்பத்தில் யாழ். முஸ்லிம் சமூகத்தின் மீள்குடியேற்றத்தின் தடைகள் குறித்து கவனயீர்ப்பு பிரேரணையொன்று  யாழ்.மாநகர சபை உறுப்பினரான சட்டத்தரணி எம்.எம். மோகேஸ்ஸினால்  கொண்டுவரப்பட்டு சபையில் விவாதிக்கப்பட்டது

மீளக்குடியேறும் முஸ்லிம்களுக்கென தனியான கொள்கை அமுலாக்கப்பட வேண்டும், யாழ். பிரதேச செயலரின் அணுகுமுறையில் மாற்றம் ஏற்படுத்த வேண்டும் அல்லது குறித்த பிரதேச செயலரை மாற்ற வேண்டும், முஸ்லிம்களின் விவகாரத்திற்கு என முஸ்லிம் கிராம சேவையாளர்கள் நியமிக்கப்பட வேண்டும் என மூன்று அம்சக் கோரிக்கைகள் கவனயீர்ப்பு பிரேரணையில் முன்வைக்கப்பட்டிருந்தது.

முஸ்லிம் யாழ்.மாநகர சபை உறுப்பினர்களின் கவனயீர்ப்பு பிரேரணையினை வரவேற்று ஆளும் தரப்பினரும் எதிர்க்கட்சி உறுப்பினர்களும் கருத்து வெளியிட்டனர்

இந்நிலையில், முஸ்லிம் பிரதிநிதிகள், தமது சமூகத்தின் பிரச்சினைகளுக்கு தீர்வு காணப்படும் வரை  சபையை பகிஷ்கரிப்பதாக தெரிவித்து, சபையை விட்டு வெளியேறினர்.

அதையடுத்து, சபை நடவடிக்கைகளை எதிர்வரும் 30 ஆம் திகதிக்கு ஒத்திவைப்பதாக மாநகர முதல்வர் அறிவித்தார்.