அமைச்சின் செயலாளர்கள் சபை அமர்வில் கலந்துகொள்ள வேண்டும்

எம்.றொசாந்த்

வடமாகாண சபை அமர்வு நடைபெறும் தினத்தில் வடமாகாண பிரதம செயலாளர், அமைச்சின் செயலாளர்கள், திணைக்கள தலைவர்கள் நிச்சயமாக கலந்து கொள்ளவேண்டும் என வடமாகாண அவைத் தலைவர் சி.வி.கே.சிவஞானம் பணித்துள்ளார்.

வடமாகாண சபையின் மாதாந்த அமர்வு கைதடியில் அமைந்துள்ள வடமாகாண சபையில் வியாழக்கிழமை (19) நடைபெற்ற போதே,  அவர் இவ்வாறு தெரிவித்தார்.

இன்றைய சபை அமர்வில் இரு அமைச்சின் செயலாளர்கள் மாத்திரமே கலந்து கொண்டனர். அதனையடுத்தே இவ்வாறு அவைத்தலைவர் தெரிவித்தார்.

மாகாண சபை அமர்வுகள் நடைபெறும் தினங்களிலோ அல்லது அதற்கு முந்திய தினத்திலோ அமைச்சுக்கள் வேறெந்த நிகழ்வுகளையும் ஏற்பாடு செய்யவேண்டாம் என்றும் சகல அமைச்சின் செயலாளர்களும் பிரதம செயலாளர் திணைக்கள தலைவர்களும் மாகாண சபை அமர்வில் கலந்து கொள்ள வேண்டும் என தெரிவித்தார்.