கடல் ஆமையை வளர்த்தவர் கைது

செந்தூர் என்ற தீபன்

ஊர்காவற்றுறை, மெளிஞ்சிமுனை பகுதியில் உள்ள வீடொன்றினுள் கடலாமை பிடித்து வைத்திருந்த 55 வயதுடைய நபரொருவர், இன்று (26) கைது செய்யப்பட்டுள்ளார் என ஊர்காவற்றுறை பொலிஸார் தெரிவித்தனர்.

ஊர்காவற்றுறை பொலிஸ் நிலையப் புலனாய்வுத் துறையினருக்குக் கிடைத்த இரகசியத் தகவலுக்கு அமைய, மெலிஞ்சிமுனை பகுதியிலுள்ள வீடொன்றின் சமையலறைக்குள் மறைத்து வைத்து வளர்க்கப்பட்டிருந்த 20 கிரோகிராம் நிறையுடை கடலாமை இதன்போது மீட்கப்பட்டுள்ளது. 

இவ்வாறு மீட்கப்பட்ட கடலாமையை, நீரியல்வள அதிகாரிகளின் உதவியுடன், ஆழ்கடலில் விடுவதற்கு நடவடிக்கை எடுக்கப்பட்டுள்ளதுடன், கைது செய்யப்பட்ட நபரை, ஊர்காவற்றுறை நீதவான் நீதிமன்றத்தில் முற்படுத்த நடவடிக்கை எடுக்கப்பட்டுள்ளது.