செலான் வங்கியானது 2014 செப்டெம்பர் 30ஆம் திகதியன்று முடிவடைந்த 9 மாதங்களில் வருமான வரிக்கு முன்னரான இலாபமாக கிட்டத்தட்ட ரூபா 3,490 மில்லியனை பெற்றுக் கொண்டதன் மூலம் மனதில் பதியத்தக்க நிதிப் பெறுபேறுகளை பதிவு செய்திருக்கின்றது. அதேவேளை ரூபா 2,253 மில்லியன் வரிக்குப் பின்னரான இலாபமானது கடந்த வருடத்துடன் தொடர்புபட்ட 9 மாத காலப் பகுதியில் வங்கி பெற்றுக்கொண்;ட ரூபா 1,536 மில்லியனுடன் ஒப்பிடுகையில் 47% அதிகரிப்பாக காணப்படுகின்றது.
இக் காலாண்டுக்கான (3ஆம் காலாண்டின்) வரிக்குப் பின்னரான இலாபத்தின் பெறுமதி ரூபா 1,041 மில்லியனாக பதிவு செய்யப்பட்டதுடன், கடந்த வருடத்துடன் தொடர்புபட்ட 3 மாத காலப் பகுதியில் அறிக்கையிடப்பட்ட ரூபா 534 மில்லியன் வரிக்குப் பின்னரான இலாபத்துடன் ஒப்பிடுகையில் இது 95% வளர்ச்சியாகவும் உள்ளது.
ரூபா 6.79 பில்லியனாக காணப்பட்ட தேறிய வட்டி வருமானம் 2014 செப்டம்பர் 30 இல் முடிவடைந்த 9 மாத காலப் பகுதியில் ரூபா 8.22 பில்லியனாக 21% இனால் அதிகரித்துள்ளது. தேறிய கட்டண மற்றும் தரகு வருமானம் ரூபா 1,542 மில்லியனில் இருந்து ரூபா 1,648 மில்லியனாக 7% இனால் உயர்வடைந்தது. கடந்த பல வருடங்களாக செலான் வங்கி திடமான வளர்ச்சிப் போக்கை தொடர்ச்சியாக பேணிவந்த நிலையிலேயே இந்த நிதிப் பெறுபேறு அடைந்து கொள்ளப்பட்டுள்ளது.
2014ஆம் ஆண்டில் செலான் வங்கி தனது வைப்புத் தளத்தை ரூபா 167.4 பில்லியனில் இருந்து ரூபா 174.8 பில்லியனாக அதிகரித்துக் கொண்டுள்ளது. இவ் வளர்ச்சியானது மிகக் குறிப்பாக நடைமுறை மற்றும் சேமிப்புக் கணக்குகளை 'தயார்நிலைப்படுத்தியதன்' (Mobilization) ஊடாக அடையப் பெற்றுள்ளது. இவ்வாறான நடவடிக்கையின் மூலம் 2013ஆம் ஆண்டு டிசம்பரில் 33% ஆக பதிவு செய்யப்பட்டிருந்த வங்கியின் குறைந்த செலவு வைப்புத் தளத்தை 2014 செப்டெம்பர் மாத இறுதியில் 36% இற்கும் அதிகமானதாக உயர்வடையச் செய்வதற்கு இடமளித்தது. பரிசீலனைக்கு எடுத்துக் கொள்ளப்பட்ட இக் குறிப்பிட்ட 9 மாத காலப்பகுதியில் செலான் வங்கியின் தேறிய முற்பணத் தொடர் ரூபா 136.5 பில்லியனிலிருந்து ரூபா 139.4 பில்லியனாக அதிகரித்துள்ளது.
தங்க விலைகளில் ஏற்பட்ட வீழ்ச்சி மற்றும் அதன் விளைவாக அடகு வைக்கும் சேவைத் தளத்தில் ஏற்பட்ட தாக்கம் போன்ற பாதக நிலைமைகளுக்கு மத்தியிலும் - 2013ஆம் ஆண்டு டிசம்பரில் 10.58% ஆக பதிவு செய்யப்பட்ட மொத்த செயற்படா சொத்துக்களை (IIS இன் தேறிய பெறுமதி) 2014 செப்டெம்பர் மாத இறுதியில் 9.85% என்ற ஒற்றை இலக்க மட்டத்திற்கு குறிப்பிடத்தக்களவுக்கு குறைவடையச் செய்தமையின் பலனாக செலான் வங்கியினால் தனது சொத்துத் தரத்தை மேம்படுத்திக் கொள்ள முடிந்தது.
கல்வியை மையமாகக் கொண்ட கூட்டாண்மை சமூகப்பொறுப்பு முன்முயற்சிகளை செலான் வங்கி தொடர்ந்து மேற்கொண்டு வருகின்ற அதேநேரம், வசதி குறைந்த பாடசாலைகளுக்கான தனது 100 நூலகங்கள் செயற்றிட்டத்தை மேலும் விரைவுபடுத்தி இருக்கின்றது. 2014ஆம் ஆண்டின் முதல் 9 மாதங்களிலும் இவ்வாறான 34 பாடசாலை நூலகங்கள் செலான் வங்கியால் திறந்து வைக்கப்பட்டுள்ளன.
வாடிக்கையாளர் சேவை அனுபவத்தை மேம்படுத்தும் நோக்கத்துடன், கிளைகளை வேறு இடங்களுக்கு இடமாற்றல் மற்றும் தரமேம்படுத்தல் செயற்றிட்டமும் 2014இல் முழுமூச்சுடன் தொடர்ச்சியாக முன்னெடுக்கப்பட்டு வருகின்றது. வரையறுக்கப்பட்ட தொழிற்பாடுகளுடன் இயங்கிவந்த 20 சௌகரிய வங்கியியல் நிலையங்கள் 2014ஆம் ஆண்டில் முழுமையான கிளை அந்தஸ்து கொண்டவையாக தரமுயர்த்தப்பட்டுள்ளன. செலான் வங்கி இக் காலப்பகுதியில் 4 புதிய கிளைகளை திறந்துள்ளதுடன் மேலும் 5 கிளைகள் முற்றாக புதுப்பொலிவூட்டப்பட்டுள்ளன. அதேநேரம் இன்னும் 3 கிளைகள் வாடிக்கையாளர்களுக்கு மேலும் நட்புறவான அமைவிடங்களுக்கு இடம் மாற்றப்பட்டு இருக்கின்றன.
2014 செப்டெம்பர் 30ஆம் திகதியில் இருந்தவாறு செலான் வங்கியின் சேவை நிலைய வலையமைப்பானது 155 கிளைகள், 170 ATM மையங்கள் மற்றும் 92 மாணவர் சேமிப்பு நிலையங்கள் ஆகியவற்றை உள்ளடக்கியதாக காணப்படுகின்றது.
2014 இன் 3ஆம் காலாண்டு இறுதியில் செலான் வங்கியின் 'மொத்த மூலதன நிறைவு வீதம்' 14.34% ஆக உயர்ந்த மட்டத்தில் பதிவாகியது. இத்துறையின் ஒழுங்குபடுத்துனரால் வரையறை செய்யப்பட்டிருக்கும் மட்டத்தை விடவும் இது மிகவும் அதிகமானதாகும். 2014 ஒக்டோபரில் 'பிட்ச்' (Fitch) ஆனது 'நிலைமாறாத' கண்ணோட்டத்துடன் செலான் வங்கிக்கு 'A-lka' தரப்படுத்தலை உறுதிப்படுத்தியிருக்கின்றது.
செலான் வங்கி இவ்வாறான சிறந்த தொழிற்பாடுகளை மேற்கொண்டதன் பயனாக, 2014 இன் 3ஆம் காலாண்டில் பங்கொன்றிற்கான உழைப்பு ரூபா 6.53 ஆக காணப்பட்டதுடன், (வரிக்கு முன்னரான இலாபத்தில்) சொத்துக்கள் மீதான வருமானம் மற்றும் பங்குரிமை மீதான வருமானம் ஆகியவை முறையே 2.10% ஆகவும் 13.44% ஆகவும் உயர்ந்த மட்டத்தில் பதிவாகியது. அதேவேளை, 2014 செப்டெம்பர் 30ஆம் திகதி இருந்தபடி செலான் வங்கியின் பங்கொன்றிற்கான தேறிய சொத்துப் பெறுமதி ரூபா 68.53 ஆக (குழுமம் ரூபா 71.53) காணப்பட்டது.
