வட்டவளை பிளான்டேஷன்ஸின் இலாபம் அதிகரிப்பு

வட்டவளை பிளான்டேஷன்ஸ் நிறுவனம் கடந்த 31 டிசம்பர் 2014ஆம் ஆண்டுடன் முடிவடைந்த ஒன்பது மாதங்களில் 5.3 பில்லியன் ரூபாவை வருவாயாகப் பெற்றுள்ளது. இது 16.6 சதவீத வருடாந்த அதிகரிப்பு என தெரிவிக்கப்படுகிறது. கடந்த வருடம் இதே காலப்பகுதியுடன் ஒப்பிடும் போது நிறுவனத்தின் வரிக்கு பின்னரான நிகர இலாபமாக 311 மில்லியனாக அமைந்திருந்ததோடு இம்முறை 409 மில்லியன் ரூபாவாக உயர்ந்துள்ளமை குறிப்பிடத்தக்கது.

வட்டவளை பெருந்தோட்ட நிறுவனம் பல்வேறு காலநிலை சவால்களை எதிர்கொண்ட போதிலும் பாம் ஒயில் மூலம் எதிர்பார்த்த அளவை விட அதிகமான செயல்திறன்களை வெளிக்காட்ட முடிந்துள்ளது.

கடந்த மூன்றாம் காலாண்டுக்கான இலாபமாக 147 மில்லியன் ரூபா பெறப்பட்டது. இது வருடாந்த இலாபத்தின் 30.9 சதவீத வீழ்ச்சியாகும். இதற்கு பிரதான காரணம் தேயிலைத் தோட்ட பகுதிகளில் கடும் மழையுடன் கூடிய காலநிலை நிலவியமையே ஆகும்.

பாம் ஒயில் மூலம் கிடைத்த இலாபமானது 593 மில்லியன் ரூபாவாகும். இந்த இலாபத்தின் மூலம் றபர் மற்றும் தேயிலை உற்பத்தியினால் வட்டவளை பெருந்தோட்ட நிறுவனம் அடைந்த நட்டத்தை ஈடுகட்ட முடிந்துள்ளது.

கடந்த மூன்றாவது காலாண்டின்போது பாம் ஒயில் மூலமாக நிறுவனம் அடைந்த இலாபமானது 172 மில்லியன் ரூபாவாகும். இதன் வளர்ச்சி விகிதம் 23.2 சதவீதமாகும். கடந்த ஒன்பது மாதங்களில் நிறுவனத்திற்கு கிடைத்த வருவாயானது 1.2 பில்லியன் ரூபாவாகும். இது 9.1 சதவீத அதிகரிப்பு என வட்டவளை பெருந்தோட்ட நிறுவனம் தெரிவித்துள்ளது.