'போதைப்பொருளை ஒழிக்க பொதுமக்களின் ஒத்துழைப்பு வேண்டும்'

-சுப்பிரமணியம் பாஸ்கரன்

கிளிநொச்சி மாவட்டத்தில் தற்போது அதிகரித்துள்ள போதைப்பொருள் விற்பனை மற்றும் பாவனை ஆகியவற்றைக் கட்டுப்படுத்த பொதுமக்கள் முழுமையான ஒத்துழைப்பு வேண்டும் என கிளிநொச்சி மாவட்ட தலைமைப் பொலிஸ் நிலைய பொலிஸார் வியாழக்கிழமை (18) தெரிவித்தனர்.

கிளிநொச்சி மாவட்டத்தில் குறிப்பாக கிராம புறங்களின் போதைப்பொருள் விற்பனை மற்றும் பாவனை மற்றும் கசிப்பு காய்ச்சும் நடவடிக்கை என்பன அதிகரித்துள்ளன.

இது தொடர்பாக அதிகம் அறிந்து வைத்திருப்பவர்கள் அப்பகுதியை சேர்ந்த பொதுமக்களே ஆகும்.

இவ்வாறான நடவடிக்கையில் ஈடுபடுபவர்கள் மற்றும் இடங்கள் தொடர்பில் தகவல்களை பொதுமக்கள் தந்துதவினால் பொலிஸார் நடவடிக்கை எடுக்க உதவியாகவிருக்கும் என பொலிஸார் கூறினர்.