குறிசுட்டகுளத்தில் அகழ்வுப் பணிகள்

-க. அகரன்

வவுனியா – கனகராயன்குளம், குறிசுட்டகுளம் பகுதியில் வெடிபொருள்கள் இருக்கலாம் என்ற சந்தேகத்தின் பேரில், நீதிமன்ற உத்தரவுடன், இன்று (03) அகழ்வுப் பணிகள் முன்னெடுக்கப்பட்டன.

குறிசுட்டகுளம் பகுதியில், நிலத்தில் புதையுண்ட நிலையில் காணப்பட்ட ஒருதொகுதி வெடிபொருள்கள் விசேட அதிரடிப் படையினரால், நேற்று (02) மீட்கப்பட்டன.

அப்பகுதியில் உள்ள குறிசுட்டகுளத்தைப் புனரமைப்பதற்கான வேலைகள் முன்னெடுக்கப்பட்டு வந்த நிலையில், நிலத்தில் சந்தேகத்துக்கிடமான பொருள்கள் இருப்பது அவதானிக்கப்பட்டு, கனகராயன்குளம் பொலிஸாருக்குத் தகவல் வழங்கப்பட்டது.

ஸ்தலத்துக்கு விரைந்த பொலிஸாரும் விசேட அதிரடி படையினரும், வெடிக்காத நிலையில் காணப்பட்ட 15 மோட்டார் செல்களையும் 6 ஆர்.பி.ஜி ரக செல்களையும் மீட்டுள்ளனர்.

இதையடுத்து, இந்தப் பகுதியில் மேலும் வெடிபொருள்கள் இருக்கலாம் என்ற சந்தேகத்தின் பேரில், நீதிமன்ற உத்தரவுடன், இன்று (03) அப்பகுதியில் அகழ்வுப் பணிகள் முன்னெடுக்கப்பட்டமை குறிப்பிட்டத்தக்கது.