தங்கத்தை தேடி, அகழ்வு பணிகள் மீள ஆரம்பிக்கப்பட்டுள்ளன

முல்லைத்தீவு முள்ளிவாய்க்கால் பகுதியில், விடுதலைப்புலிகளால் புதைக்கப்பட்டதாக தெரிவிக்கப்படும் தங்கத்தை தேடி, அகழ்வு பணிகள் இன்று (06) காலை மீள ஆரம்பிக்கப்பட்டுள்ளன.

முல்லைத்தீவு நீதவான் எஸ்.லெனின்குமார் முன்னிலையில், இராணுவத்தினர், பொலிஸ் விசேட அதிரடிப்படையினர் மற்றும் கடற்படையினர் இணைந்து குறித்த அகழ்வு பணியை முன்னெடுத்துள்ளனர்.

முல்லைத்தீவு முள்ளிவாய்க்கால் கிழக்கு பகுதியில் விடுதலைப்புலிகளால் புதைக்கப்பட்ட தங்கம் உள்ளதாக, கிளிநொச்சி மாவட்ட விசேட அதிரடிப்படையினருக்கு கிடைத்த தகவலின் அடிப்படையில், முல்லைத்தீவு நீதவான் எஸ்.லெனின்குமார் முன்னிலையில் கடந்த ஜனவரி மாதம் 17ஆம் திகதி அகழ்வுப்பணிகள் இடம்பெற்றன.

இதன்போது, அகழ்வுக்கான இயந்திரத்தின் அளவு போதாமையால், அன்றைய தினம் அகழ்வு பணிகள் ஒத்திவைக்கப்பட்டமை குறிப்பிடத்தக்கது.