தேர்தல் பிரசார வீடியோவுக்காக ஆடை களைந்த பெண் அரசியல்வாதி

போலந்தைச் சேர்ந்த பெண் அரசியல்வாதியொருவர் தேர்தல் பிரசார வீடியோவொன்றில் ஆடைகளை களைந்து போஸ்கொடுத்ததற்காக அவரின் சொந்தக் கட்சியினாலேயே விமர்சிக்கப்பட்டுள்ளார்.

போலந்தின் ஜனநாயக இடதுசாரி முன்னணியின் வேட்பாளரான, காடர்ஸினா லெனார்ட் எனும் 23 வயதான பெண்ணே இவ்வாறான விமரசனத்திற்கு உள்ளாகியுள்ளார்.

இவர் தனது தேர்தல் பிரசாரத்தில் வாக்காளர்களின் கவனத்தை ஈர்ப்பதற்காக, 40 விநாடிகள் கொண்ட இந்த  வீடியோவில் தோன்றியுள்ளார்.

அந்த வீடியோவின் ஆரம்பத்தில், இறுக்கமான கோட் சூட், மேலாடை, கண்ணாடி என்பவற்றை அணிந்தவாறு கதிரையொன்றில் அமர்ந்திருக்கிறார் காடர்ஸினா.

ஆனால், அவர் இருக்கையிலிருந்து எழுவதற்கு முன்பு தனது கழுத்துப்பட்டி முதல் ஒவ்வொரு ஆடையாக கழற்றி கமெராவை நோக்கி எறிகிறார். இறுதியில் பிராவுடன் மாத்திரம் அவர்  தோன்றுகிறார்.

அக்காட்சியின் இறுதியில்  'இன்னும் வேண்டுமா? எஸ்.எல்.டிக்கு (போலந்தின் ஜனநாயக இடதுசாரி முன்னணிக்கு) வாக்களியுங்கள் எங்களால் மட்டுமே இன்னும் அதிகமாக செய்ய முடியும்' என அவர் கூறுகிறார்.

'நான் இளையவர்களை இலக்குவைத்து பிரசாரம் செய்கிறேன். துரதிஷ்டவசமாக அவர்கள்  சர்ச்சைக்குரிய விஷயங்களில் தானே ஆர்வம் செலுத்துகின்றனர்' எனக் கூறி காடர்ஸினா தனது நடவடிக்கையை நியாயப்படுத்தியுள்ளார்.

ஆனால், காடர்ஸினாவின் நடவடிக்கையை அவரின் கட்சியினரே கடுமையாக விமர்சித்துள்ளனர்.

கட்சி அரசியல் தொடர்பான வீடியோக்கள் இப்படியானதாக இருக்கக்கூடாது என அக்கட்சியின் பேச்சாளர் தோமஸ் கலீட்டா கூறியுள்ளார்.

'இடதுசாரி அரசியலில் இவ்வாறான விடயங்களுக்கு இடமிருப்பதாக நான் எண்ணவில்லை என செக்ஸ் விளம்பரங்களை நாம் தடைசெய்ய வேண்டும்' எனவும் அவர் கூறியுள்ளார்.