ஆர்ப்பாட்டத்தில் ஈடுபட்ட பெண்களை பொலிஸார் நிர்வாணமாக்கி காட்டில் கைவிட்டதாக குற்றச்சாட்டு

பெலாரஸ் தலைநகரான மின்ஸ்கில் ஆர்ப்பாட்டத்தில் ஈடுபட்ட உக்ரேனைச் சேர்ந்த பெண்ணிய வாதிகள் மூவரை பொலிஸார் காடொன்றுக்கு கொண்டு சென்று  நிர்வாண கோலத்தில் விட்டுச் சென்றதாக  அப்பெண்கள் தெரிவித்துள்ளனர்.

மின்ஸ்க் நகரில் இப்பெண்கள் மூவரும் டொப்லெஸ் கோலத்தில் ஆர்பாட்டத்தில் ஈடுபட்டனர்.

அவர்களை கைது செய்த பொலிஸார்  அப்பெண்களின் கண்களைக் கட்டி,  காட்டிற்கு கொண்டு சென்றதாகவும் பின்னர்  அப்பெண்களின் ஆடைகளைக் களைந்துவிட்டு,   உடலில் எண்ணையை ஊற்றிவிட்டுச் சென்றதாகவும் பெண்ணியவாத குழுவினர் அவர்களின் இணையத்தளத்தில் தெரிவித்துள்ளனர்.

பெலரஸ் ஜனாதிபதி அலெக்ஸாண்டர் லூகாசென்கோவ் பதவியேற்று ஒருவருடம் பூர்த்தியடைந்ததை முன்னிட்டு இவர்கள் ஆர்ப்பாட்டத்தில் ஈடுபட்டிருந்தனர். அடிக்கடி டொப்லெஸ் கோலத்தில் ஆர்ப்பாட்டத்தில் ஈடுபடுவது இவர்களின் வழக்கமாகும்.

இளம் பெண்களை, சமூக விழிப்புணர்வு, செயற்பாடு, புத்திகூர்மை, கலாசார அபிவிருத்தி அடிப்படையில் ஒன்றிணைய வலியுறுத்துவதற்காக தாம் இந்த ஆர்ப்பாட்டத்தை மேற்கொண்டதாக  அக்குழு தெரிவித்துள்ளது.

இந்த ஆர்ப்பாட்டத்தில் ஈடுபட்டிருந்த பெண்களின் கண்களைக் கட்டி அவர்களை காட்டிற்கு கொண்டு சென்ற பொலிஸார், அவர்களுக்குத் தீமூட்டப் போவதாக அச்சுறுத்தியதுடன்  அவர்களது தலைமயிர்கள் கத்தரியினால் வெட்டப்பட்டதாகவும் தெரிவிக்கப்பட்டுள்ளது.

பின்னர் அப்பெண்கள் எந்த ஆவணங்களுமின்றி, நிர்வாணக்கோலத்துடன் காட்டில் கைவிடப்பட்டதாகவும் பின் அவர்கள் சிறிய கிராமம் ஒன்றிற்கு நடந்து சென்றதாகவும் மேற்படி பெண்ணியவாதிகள் குழு தெரிவித்தள்ளது.

மின்ஸ் நகரிலுள்ள உக்ரேனிய தூதரகம், இப்பெண்களின் தகவலை  உறுதிப்படுத்த மறுத்துள்ளது. எனினும் இதுகுறித்து இராஜதந்திரியொருவர் விசாரணை நடத்தவுள்ளதாக அத்தூதரகம் தெரிவித்துள்ளது.

இப்பெண்கள் ஆத்திரமூட்டும் வகையில் செயற்பட்டதாக பெலாரஸ் அரசாங்க பேச்சாளர் ஒருவர் கூறியுள்ளார்.

கடந்த வருடம் நடைபெற்ற பெலாரஸ் ஜனாதிபதித் தேர்தல் முறையாக நடைபெறவில்லை என 80 சதவீதமான சர்வதேச கண்காணிப்பாளர்கள் தெரிவித்துள்ளனர்.

இந்த ஆர்ப்பாட்டத்தில் செய்தி சேகரிக்கச் சென்ற 6 ஊடகவியலாளர்கள் கைது செய்யப்பட்டதாக ஏ.எவ்.பி. தெரிவித்துள்ளது.