பனைமரக் கடத்தல்: மூவர் கைது

பூ.லின்ரன்

  வடமராட்சி கிழக்கு, வெற்றிலைக்கேணி பகுதியில் சட்டவிரோதமான முறையில் பனைமரங்களைக் கடத்த முற்பட்ட மூவர் மருதங்கேணி பொலிஸாரால் சனிக்கிழமை (07) இரவு கைது செய்யப்பட்டுள்ளனர்.

வெற்றிலைக்கேணி பகுதியில் நீண்டகாலமாக பனைமரங்கள் சட்டவிரோதமாக அழிக்கப்பட்டு, வெளிமாவட்டங்களுக்கு கடத்தப்படுவதாக பொலிஸாருக்குத் தொடர்ச்சியாக முறைப்பாடுகள் கிடைத்து வந்தன. இது குறித்து தீவிர விசாரணைகளை முன்னெடுத்து வந்த பொலிஸாருக்குக் கிடைத்த இரகசிய தகவலின் அடிப்படையில் நேற்று இரவு விசேட சுற்றிவளைப்பு மேற்கொள்ளப்பட்டது.

இந்த சுற்றிவளைப்பின் போது:

உரிய அனுமதிப்பத்திரங்கள் இன்றி வெட்டப்பட்டு, கடத்துவதற்காக மறைத்து வைக்கப்பட்டிருந்த பெருந்தொகையான பனைமரங்கள் கைப்பற்றப்பட்டன.

இக்கடத்தல் சம்பவத்துடன் தொடர்புடைய மூன்று சந்தேகநபர்கள் கைது செய்யப்பட்டனர்.

கைது செய்யப்பட்ட சந்தேகநபர்களிடம் மேலதிக விசாரணைகளை மேற்கொண்டு வரும் மருதங்கேணி பொலிஸார், அவர்களை நீதிமன்றில் ஆஜர்ப்படுத்த நடவடிக்கை எடுத்துள்ளனர்