ஜெயலலிதா தமிழ் மக்களை தவறாக வழிநடத்த முற்படுகிறார்: கருணாநிதி

இலங்கை மீது இந்திய மத்திய அரசு  பொருளாதார தடை விதிக்க வேண்டுமென  தமிழக சட்டசபையில் நிறைவேற்றப்பட்ட தீர்மானமானது மக்களை தவறாக வழிநடத்துவதற்காக கையாளப்பட்ட பழைய தந்திரோபாயம் என தமிழக முன்னாள் முதல்வரும் தி.மு.க. தலைவருமான மு. கருணாநிதி விமர்சித்துள்ளார்.

நேற்று வெள்ளிக்கிழமை நடைபெற்ற தி.மு.க வின் நிறைவேற்றுக்குழுக் கூட்டத்தின்போது, ஈழம் தொடர்பாக தமிழக சட்டசபையில் நிறைவேற்றப்பட்ட தீர்மானத்திற்கு தி.மு.க ஆதரவு வழங்க முன்வந்தபோதிலும் தி.மு.க வையும் அதன் தலைவர் கருணாநிதியையும் தாக்கி தமிழக முதல்வர் ஜெ.ஜெயலலிதா ஆற்றிய உரைக்கு  தி.மு.க நிறைவேற்றுக்குழு கண்டனம் தெரிவித்தது.

2002 ஆம் ஆண்டு, எல்.ரி.ரி.ஈ. தலைவர் பிரபாகரனை கைது செய்து இந்தியாவிடம் ஒப்படைப்பதற்கு இலங்கை அரசாங்கத்தை வலியுறுத்த வேண்டும் என அ.இ.அ.தி.மு.க. தீர்மானம் நிறைவேற்றியதையும் தி.மு.க. சுட்டிக்காட்டியுள்ளது.

இலங்கை இராணுவம் தமிழர்களை கொல்ல முற்படவில்லை எனவும் யுத்தத்தில் அப்பாவி மக்களும் கொல்லப்படத்தான் செய்வார்கள் என முன்னர் ஜெயலலிதா கூறியமைக்கும் தி.மு.க கண்டனம் தெரிவித்துள்ளது.

கச்சதீவை இலங்கைக்கு வழங்குவது தொடர்பான தீர்மானத்தை மறுபரிசீலனை செய்யுமாறு 1974 ஆம் ஆண்டு திமுக. நாடாளுமன்றத்தில் தீர்மானம் நிறைவேற்றியதாகவும் தி.மு.க சுட்டிக்காட்டியுள்ளது.

2011 ஆம் ஆண்டு தேர்தல் விஞ்ஞாபனத்தில் கச்சதீவை மீளப்பெற மத்திய அரசை வலியுறுத்தியிருந்ததாகவும் தி.மு.க தெரிவித்துள்ளது.