ஜே.வி.பி.அலுவலகத்தை சேதப்படுத்தி மலர்வளையம் வைத்த ஆயுததாரிகள்

(ஹிரான் பிரியங்கர ஜயசிங்க)

கருவலகஸ்வௌ, சாலியவௌ பிரதேசத்தில் அமைக்கப்பட்டுள்ள மக்கள் விடுதலை முன்னணியின் தேர்தல் பிரசார அலுவலகமொன்று இன்று அதிகாலை ஆயுததாரிகள் சிலரால் சேதமாக்கப்பட்ட நிலையில் மலர்வளையம் வைக்கப்பட்டுள்ளது.

அத்துடன் சம்பவத்துடன் தொடர்புடையதான சந்தேகத்தின் பேரில் ஸ்ரீலங்கா சுதந்திரக் கட்சியின் ஆதரவாளர் ஒருவர் கைது செய்யப்பட்டுள்ளார் என்று சாலியவௌ பொலிஸார் தெரிவித்தனர்.

இன்று அதிகாலை ஒரு மணியளவில் குறித்த பிரதேசத்துக்கு வான் ஒன்றில் சென்றுள்ள ஆயுததாரிகள் சிலர் மேற்படி அலுவலகத்தை கடுமையாக சேதப்படுத்திவிட்டு அங்கு மலர் வளையம் ஒன்றை வைத்துவிட்டுச் சென்றுள்ளனர்.

சம்பவம் தொடர்பான மேலதிக விசாரணைகளை சாலியவௌ பொலிஸார் மேற்கொண்டு வருகின்றனர்.