அட்டாளைச்சேனை வைத்தியருக்கு எதிராக ஊழல் குற்றச்சாட்டு: மீண்டும் விசாரணை நடத்த பணிப்பு

(ஹனீக் அஹமட்)

அட்டாளைச்சேனை அரசாங்க வைத்தியசாலையில் கடமையாற்றும் வைத்தியர் றஹீம் என்பவர் மேற்கொண்டதாகக் கூறப்படும் அரச நிதி மோசடி, ஊழல் மற்றும் அதிகார துஷ்பிரயோகம் தொடர்பில் விசாரணையினை மேற்கொண்டு இரு வாரங்களுக்குள் அறிக்கையொன்றை சமர்ப்பிக்குமாறு கல்முனை பிராந்திய வைத்திய சேவைகள் பணிப்பாளர் டாக்டர் எம்.எஸ்.எம்.இப்றாலெப்பை, அட்டாளைச்சேனை சுகாதார வைத்திய அதிகாரி டாக்டர் பறூசா நக்பருக்கு உத்தரவிட்டுள்ளார்.

கல்முனை பிராந்திய வைத்திய சேவைகள் பணிப்பாளரால் அட்டாளைச்சேனை சுகாதார வைத்திய அதிகாரிக்கு அனுப்பி வைக்கப்பட்டுள்ள கடிதத்திலேயே இந்தப் பணிப்புரை விடுக்கப்பட்டுள்ளது.

அக்கடிதத்தில் மேலும் தெரிவி;க்கப்பட்டுள்ளதாவது,

குறித்த வைத்தியர் றஹீம் தொடர்பில் தனது 15.10.2010ஆம் திகதியிடப்பட்ட கடிதத்துக்கு அமைவாகவும் மேலும், இவ்வைத்தியருக்கு எதிராக அட்டாளைச்சேனை விழிப்புக் குழுவின் செயலாளரால் கிழக்கு மாகாண சுகாதார சேவைகள் பணிப்பாளருக்கு அனுப்பிவைக்கப்பட்ட முறைப்பாடுகளுக்கு அமைவாகவும் - மேல் விசாரணையொன்றை மேற்கொண்டு, இரு வாரங்களுக்குள் அறிக்கை சமர்ப்பிக்குமாறு உத்தரவிடப்பட்டுள்ளது.

ஏற்கெனவே, அரச நிதி மோசடி, ஊழல் மற்றும் அதிகார துஷ்பிரயோகம் போன்றவைகளில் ஈடுபட்டதாகக் கூறப்படும் வைத்தியர் றஹீம் விசாரணையொன்றுக்கு உள்ளாக்கப்பட்ட நிலையிலேயே, மீண்டுமொரு விசாரணைக்கு உத்தரவிடப்பட்டுள்ளமை குறிப்பிடத்தக்கது.